LUBOK ANTU, 7 Oktober: Lubok Antu endang seruran nyadi endur ke dilawa mensia mayuh tebal agi lebuh begigaka pekayan tradisional tauka gari asal baka ngepan Iban.
Ku Tay Chie Pen, siku pedaja madah, mensia mayuh ke Lubok Antu begigaka gari asal baka ngepan Iban tu ari serata Sarawak baka datai ari Bintulu, Miri enggau Kuching.
Iya berengkah bedajaka gari enggau perengka asal tu kenyau ari lebih 20 taun ke udah ketegal rindu meda barang asal tebal agi ngepan Iban enggau kraf jari ke digaga orang Iban.
“Kedai tu udah dibuka lebih kurang 20 taun ke udah kenyau ari umur aku 26 taun. Suba aku semina muka kedai runchit, udah nya ditukar alai aku bejualka ngepan Iban, keresa lama enggau kraf jari.
“Mayuh orang datai kitu ari serata Sarawak baka Bintulu, Miri enggau Kuching ke alai sekeda bisi ngambi barang ditu ngambika dijual di pelilih bukai.
“Orang datai suah begigaka ngepan Iban ti nyengkaum Kain Tating, Nyawir, Sugu Tinggi enggau keresa lama baka tawak enggau engekerumung. Nya mih suah digaga orang lebuh datai kitu,” ku iya madah agi.
Nangkanka nya, Hii Mui Chin madahka, diatu benung bela ngemanahka baru pengawa dagang pengudah kena empas ke balat ari pandemik COVID-19 sereta udah lama ditutup.
Pia mega ku iya madah, mensia mayuh dipeda kurang datai ke Lubok Antu begigaka gari asal enggau barang asal tu pengudah pandemik.
“Diatu pengawa dagang bisi kurang mimit laban pengudah pandemik mensia mayuh kurang datai ke Lubok Antu begigaka ngepan Iban enggau barang asal. Kami diatu pan benung ba renggat mulaika baru pemanah pengawa dagang.
“Suba maya PKP (atur nagang pemindah) kami bedagang nguna chara dalam tali arus aja. Barang sapa ke deka meli, sida nganjung pesan pandak nengah Whatsapp madahka diri deka meli, udah nya kami ngirum nengah pos.
Berindik ari nya, Tay Chie Pen ngarapka mayuh agi program enggau aktiviti dagang temuai bisi diatur di Lubok Antu dikena matak mayuh agi temuai datai ngagai pelilih nya seraya ngeranchakka agi aktiviti dagang baka ke sebedau tu.
“Aku arapka mayuh agi program diatur di Lubok Antu dikena ngeranchakka agi sektor dagang temuai di sitak tu. Suba Lubok Antu endang seruran rami laban orang menua bukai (Badau) bisi mai barang kraf jari kitu lalu orang ari menua pesisir di Lubok Antu bisi mai asil berikan enggau asil betanam betupi,” ku iya madah agi.
Kelimpah ari nya, iya madahka pengawa bedaja enggau ngaga kraf jari, gari asal bansa Iban patut dikemerat ngambika enda lenyau ditabanka runyut arus pemansang. – TVS
