Kuala Lumpur, 7 Okt : Perintah Besai nengah agih belanja Malaysia 2023 udah ngungkupka penyampau RM1.2 bilion dikena ngangktamanah sekula repuk di Sabah enggau Sarawak.
Ku Menteri Pekara Wang, Tengku Datuk Seri Zafrul Abdul Aziz madah, agih belanja tu dikena ngangkatmanah infrastrakcha sekula repuk ti nyengkaum nganti begunan kayu lama.
“Bisi RM1.2 bilion disediaka dikena ngangkat manah infrastrakcha sekula repuk di Sarawak ti ngaul 123 projek di Sabah enggau 182 projek di Sarawak.
“Agih belanja tu dikena nentuka nembiak sekula ba kedua-dua nengeri nya ulih ngasaika penyamai sereta pengelantang lebuh nguna infrastrakcha ke manah,” ku iya madah.
Kelimpah ari nya Tengku Zafrul madahka, perintah deka berengkah ngaga baru lima buah sekula enggau ungkus RM430 juta ba taun 2023 ila.
Projek ngaga baru lima buah sekula tu ngaul SMK Nabalu Sabah, SMK Dudong Sarawak, SK Paya Dusun Terengganu, SK Cyberjaya 2 enggau SMK Denai Alam Selangor.
“Nangkanka nya, perintah udah ngungkupka penyampau RM2.3 bilion dikena nyendiaka alai belajar ke kondusif enggau likun ungkup nembiak lalu penambah tu nambah enti dibanding enggau agih belanja RM1.7 bilion taun tu.
“Ari penyampau nya, RM1.1 bilion diungkupka dikena nyeruri enggau ngemanahka sekula ke nyerangkung Sekolah Kebangsaan, Sekolah Jenis Kebangsaan Cina enggau Tamil sereta Sekolah Agama,” ku iya madah agi.
Nengah Agih Belanja 2023 mega, perintah besai udah nambahka taka Rancangan Makanan Tambahan (RMT) ari RM2.50 ngagai RM3.50 ungkup Semenanjung enggau RM3.00 ngagai RM4.00 ungkup Sabah, Sarawak enggau Labuan lalu, taka tu berengkah dipejalaika ba pun bulan tu. – TVS
