KUCHING, 2 Okt: Sarawak diatu endang begunaka Palan Tungkul Atau Satelit dikena nentuka akses nyaga pengerai ti lebih manah, tebal agi ba mengeri mit.
Sapit Premier Sarawak Dato Sri Dr Sim Kui Hian madahka, perambu deka numbuhka palan nya ba Sibu, Miri enggau Bintulu udah dipadahka ngagai Menteri Pengerai Khairy Jamaluddin apin lama ke udah.
“Kami mandangka perambu palan sakit riman kami dulu. Udah nya, baru kami bulih pakar ke chukup nyentuk kami ulih mungkal palan satelit ba mengeri bukai ba Sarawak,” ku iya madah ngagai pengarang berita pengudah bejadika program Hari Tungkul Atau Sedunya 2022.
Dr Sim ke mega Menteri Pengerai Mensia Mayuh, Pengawa Berumah enggau Kaunsil Kandang Menua nerangka, penyampau RM20 juta ungkus deka dikena ngaga tetiap palan tungkul atau satelit.
Ku iya madah, pemisi Palan Tungkul Atau Satelit enggau Unit Sakit Riman, ngemudahka mensia mayuh ngulihka akses pengawa nyaga pengerai ke lebih manah sereta jampat.
Kelimpah ari nya, iya madahka pengawa ngemeranka autonomi pengerai ukai semina tangkup pengawa, tang nyadika tanda meri perati ngagai Sarawak.
“Kami endang senaka ulih ngemeranka autonomi pengerai ngambika pemujur pekara tu meri pemaik ngagai kitai.
“Bala kaban parlimen kitai ba Sarawak bisi mantu kitai,” ku iya madah agi.
Ba pengerembai bukai, Dr Sim ngarapka ungkup ulih diberi mayuh agi ngagai sektor pengerai di Sarawak ba dalam Agih Belanja 2023 ti deka dibantaika enda lama agi.
Ku iya madah, nengah agih belanja nya Sarawak ulih ngangkat manah perengkaguna pengerai ke udah bisi disediaka ba nengeri tu.
