KUCHING, 2 Okt: Kabinet Sarawak udah ngemendarka penumbuh Ejensi Pemansang Bagi Menua Betong (BDDA) lebuh Hari Empat.
Sapit Premier Sarawak, Datuk Amar Douglas Uggah Embas madahka, BDDA nya mungkur sitak Kunsil Nengeri (DUN) Layar, Bukit Saban, Krian, Kalaka, Saribas, Beting Maro, Kabong sereta sekeda kandang menua ba Lingga.
Iya madahka, BDDA deka ngatur makmal ti kedua berengkah hari dua minggu baru ba Kuching dikena nentuka entara pekara ke patut diberi perati bepelasarka timbal ke diterima.
“Asil penatai pemisi ke lebih manah ulih mantu ngangkatka tikas pengidup rayat, ku iya madah nengah siti penerang.
Uggah ke mega Kaban Kunsil Nengeri (ADUN) Bukit Saban nerangka, nyauka semua kandang endur di Bagi Menua Betong udah ngasaika bungkur jalai alun ke manah, enda nyengkaum krian kelimpah ari bekal ai enggau karan.
Iya madahka, pemar ke ditapi BDDA udah tu iya nya ngemansangka aktiviti ekonomi ke ulih nyungkak asil penatai pemisi ti lebih manah seraya ngaga mayuh agi jalai ladang.
Berebak ari nya, Uggah ngarapka peranak di menua pesisir, sekalika di betong enggau ba pelilih bukai di Sarawak sedia nguna teknologi baru sereta chara betanam enggau bekebun moden.
“BDDA deka dikemansangka enggau pengawa nanam buah, sayur, nupi manuk sereta jelu tupi bukai ke tau mantu nyungkak asil penatai pemisi rayat,” ku iya madah agi.
Ku iya madah, naka ke diatu, bisi sebuah kompeni semak Spaoh, benung meras ngemansangka benih rungan hibrid, jagung, padi sereta utai tanam ke bukai.
Pemisi leka utai tauka benih nya ulih mantu negapka agi pemansang pengawa bekebun moden ba baruh BDDA.
