SIBU, 28 Sept: Opis Menteri Pengerai Mensia Mayuh, Pengawa Berumah enggau Kaunsil Kandang Menua deka mantaika perambu ngagai kabinet nengeri bekaul enggau pangku pengawa chairman tetap ungkup kaunsil pelilih ke bisi ba nengeri tu ke naka diatu agi dituaika Pegawai Pelilih (DO).
Nitihka penerang ari UKAS, Sapit Menteri Pengerai Mensia Mayuh, Pengawa Berumah enggau Kaunsil Kandang Menua, Datu Dr Penguang Manggil madahka, nyiri siku chairman tetap kaunsil pelilih endang beguna dikena ngelempungka tangkup pengawa Pegawai Pelilih ti majak nambah enggau berat.
“Kitai mesti nyingkang ke mua berindik ari kaunsil diatu napi mayuh macham pemar enggau pengawa seraya begunaka siku chairman tetap,” ku iya madah rambau aum media pengudah sesi ‘Engagement With Stakeholder’ PBT Central Zon ke diatur ba Librari Sibu lebuh Hari Dua.
Penguang nerangka, pengawa numbuhka pangku pengawa chairman tetap kaunsil pelilih tu endang patut awakka ulih mantu kaunsil bejalaika servis ti pemadu manah ngagai komuniti.
Beduduk ari nya, iya ke mega Kaban Kunsil Nengeri (ADUN) Marudi madahka, naka ke diatu semina Kaunsil Pelilih Marudi (MDM) aja ke udah bisi chairman tetap ke udah dichiri.
Ba pengerembai ke sama, iya madahka, opis menteri senaka ulih mantu nambahka asil penatai pemisi ungkup Opis Kaunsil Kandang Menua (PBT) berindik ari pengawa ti dipejalaika opis nya nyau majak nambah.
“Peminta guna ari mensia mayuh diatu majak nambah ti ngujungka PBT mesti ngerembaika servis nyentuk datai ba menua pesisir sereta pengawa nya begunaka ungkus belanja ke besai.
“Beduduk ari nya, kitai mesti ngiga jalai dikena nambahka belanja ti mega belematika sukut pemesai kandang menua ke dijaga sereta penanggul logistik ke ditapi,” ku iya madah agi.
