KANOWIT, 28 Sept: Program ke ngaul pengari rayat enggau komuniti endang patut suah diatur dikena negutka kaul seraya ulih nentuka pengari rayat nemu senentang sebana, penanggul enggau pemansang ti dirandaka rayat.
Nitihka penerang ari UKAS, Kaban Kunsil Nengeri (ADUN) Ngemah, Anyi Jana madahka, nengah program baka nya iya ulih ninga entara pekara ke bekaul ti dikunsika bala tuai rumah enggau tuai peranak ke bukai.
“Program ke diatur tu deka nyadi pelantar dikena meda enggau beratika penanggul ke ditapi rayat, lebih agi komuniti rumah panjai,” ku iya madah rambau ngulu Program Pemesai Begulai enggau Rayat di Rumah Anthony Nanga Nirok apin lama ke udah.
Bisi 150 iku peranak ke mendam ba Sungai Ngemah ngulu program nya lebih agi raban ari Komiti Pemansang enggau Pengelikun Genturung Pendiau (JKKK) rumah panjai.
“Aku meri terima kasih ngagai JKKK Rumah Anthony laban udah ngangauka aku ngaul diri ba dalam program tu.
“Senentang sekeda isu ti dibantaika Tuai Rumah Anthony baka minta jalai, bungkur internet ke manah enggau kus ungkup Tuai Raban Bansa, aum deka diatur begulai enggau ejensi perintah ke bekaul,’ ku iya madah.
Anyi nerangka, bidang pelajar entara pekara ti dikemeratka ba sitak Ngemah dikena nentuka siku nembiak ari siti ruang bilik ulih nampung pelajar nyentuk ke tikas Degree.
“Beduduk ari nya, palan servis DUN Ngemah bisi meri insentif akademik ngagai nembiak ke nyulut ba dalam peresa Sijil Pelajaran Malaysia (SPM), Sijil Tinggi Pelajaran Malaysia (STPM) sereta sida ke mujur nampung pelajar ba tikas Institusyen Pelajar Tinggi (IPT),” ku iya madah.
Ba pengerembai bukai, Anyi nyaran tetiap ruang bilik bulih asil penatai pemisi manggai RM6,000 sebulan seriran enggau juluk Sarawak ti deka nyadi nengeri maju ba taun 2030.
Iya mega ngelalau rayat ba sitak nya terus meri sukung ke rat ngagai perintah Gabungan Parti Sarawak (GPS) ngambika pemansang ulih terus dibai ungkup pemaik enggau pengelantang rayat ba DUN Ngemah.
