SIBU, 25 Sept: Sapit Menteri Pelajar, Inovasyen enggau Pemansang Pengelandik Sarawak, Dr Annuar Rapaee minta projek ngaga Sekula Primari (SK) Nanga Entaih digaga enggau jampat.
Tu laban, nyema sekula enda digaga jampat nya deka meri penanggul ngagai pengawa pengajar lebih agi nembiak sekula.
Ku iya, kunteriktor ti ngaga projek sekula mega udah diberi jaku tangkan ketegal enda bejalaika projek nitihka timpuh ti udah ditetapka ngujungka napi pengelaun.
“ Empat buah sekula iya nya dalam siti pakej ti nguna agih belanja penyampau RM22.79 juta ti mungkur sekeda skop nyengkaum kelas baru, buding enggau kuarters pengajar.
“Dua ari empat buah sekula tu napi pengelaun lebih ari 30 peratus lalu kebuah tu nyadi ketegal sistem IBS ti begunaka bekal ari Semenanjung,” ku iya dalam siti video ba laman facebook iya kena Hari Minggu.
Annuar ke mega Kaban Kunsil Nengeri (ADUN) Nangka madahka, kunteriktor mega udah mantaika ‘catch up plan’ dikena nentuka kereja ngaga projek sekula tu ulih digaga enggau jampat.
SK Nanga Entaih Di Sitak Parlimen Julau iya nya entara sekula ari empat buah sekula ti dipasukka ba dalam Pakej 4, ngemanahka baru sekula repuk ba baruh agih belanja RM1 bilion ringgit ungkup renggat kedua.
Beduduk ari iya, Annuar nyemetak madahka opis menteri enda deka bebatak asur enggau kunteriktor ti enda nembuka projek ke nitihka timpuh ke patut.
