KUCHING, 25 Sept: Gerempung tauka serakup ti bekaul enggau pengawa ngenanka seni, adat enggau main asal Iban patut terus begempung dikena nentuka juluk penumbuh gerempung ulih dijapai.
Kaban Kunsil Nengeri (ADUN) Pelagus, Wilson Nyabong Ijang madahka, tetiap gerempung Iban mesti begempung enggau pangan diri ngambika tetiap program enggau langgur ke diatur ulih dikemujurka sereta lanchar dipejalaika.
Ambika chunto ku iya madah, Persatuan Ngajat Asal Iban tauka (NGASI) ke ngatur kelas ngajat endang patut dipuji sereta dikerembaika nyentuk ke menua pesisir, ke ukai semina ngaul peranak diau ba mengeri.
“Nyadi aku meri besai terima kasih ngagai kita semua laban udah angkun sereta tetap nuju juluk penemu gerempung, kita enda limpang, kita ngangkatka main asal bansa kitai laban main asal tu siti chara bansa kitai dikelala bansa bukai,” ku iya madah rambau ngarika Sapit Menteri Dagang Temuai, Industri Kreatif enggau Seni Pemerindang Datuk Snowdan Lawan bejadika pengerami Makai Lemai enggau Nyerahka Setipikit Tembu Kelas Ngajat ti diatur NGASI lebuh Hari Enam.
Nangkan ke nya, Wilson nerangka, ukai semina pengelandik ngajat aja dikemeratka, tang mega ngaul pengelandik betaboh, begendang, bepantun enggau semua main asal iban ti ulih dipelajar enda ngira renggat umur.
“Nyadi, pengawa main asal ti dipunka NGASI tu endang badas laban ngajar bala nembiak rebak baru.
“Gerempung tu ulih nempa pengerindu ngagai nembiak awakka sida landik ngajat sereta besaup ngenanka main asal bansa kitai,” ku iya madah agi.
Nya alai, ku iya madah, pengari rayat enggau opis menteri endang nyukung program ke diatur ti ngaul pengawa ngangkatka seni enggau main asal ti diatur siti-siti gerempung ke mai tuju sereta ngundan reti ke chukup manah.
Ba pengerami ke sama, Wilson madahka, Datuk Snowdan Lawan bisi meri geran penyampau RM10,000 ngagai NGASI dikena sida bejalaika program enggau pengawa ke patut. – TVS
