KUCHING, 21 Ogos: Opis Menteri Dagang Temuai, Seni enggau Main Asal (MOTAC) nengah Kraftangan Malaysia deka terus mantu enggau ngemansangka pengelandik raban nembiak dalam bidang kraf jari ngambika bisi pengidup ke lebih manah.
Menteri MOTAC, Dato Sri Nancy Shukri madah, opis menteri nya deka bekerejasama enggau Opis Pelajar Malaysia (KPM) enggau Institut Kraf Menua (IKN) deka numbuhka gerempung kraf jari ba sekula ke tuju pekara nya.
Ku iya, tuju numbuhka gerempung kraf jari tu iya nya sebagi ari chara dikena nerenak pengerindu nembiak ba pengawa asil pengelandik jari.
“ Tuju bejalaika pekara tu iya nya dikena nerenak pengerindu nembiak sekula primari enggau sekondari ba pengawa ngaga asil pengelandik jari ke ulih ngenataika asil penatai pemisi,” ku iya.
Iya mansutka jaku nya rambau ba pengerami bejadika Esplande Simunjan lebuh Hari Enam.
Nancy ke mega Kaban Parlimen Batang Sadong madah, penumbuh nya mega seriris enggau inisiatif kraf jari Malaysia iya nya ‘Cakna Kraf’ nengah program Studio Kraf Kreatif, Pusat Kecemerlangan Kraf di Insititut Kraf Menua (IKN) dikena meri penemu sentang teknik enggau proses ngasilka produk kraf ari renggat tumu lebih agi ngagai nembiak.
“ Pengudah sida ambis sekula, sida ti deka nampung pelajar ngagai renggat Sijil Kemahiran Malaysia (SKM) dalam bidang kraf enggau chara formal tau minta ba kampus besai IKN Rawang, Kampus Satelit IKN Sarawak tauka Kampus Satelit IKN Sabah ti nguna standard pengelandik kereja tauka NOSS ari Opis Pemansang Pengelandik,” ku iya.
