Marudi , 19 Ogos : Kaban Kunsil Nengeri (ADUN) Marudi, Datu Dr Penguang Manggil madahka, sebuah agi palan bedaja deka digaga ba Marudi awakka raban pedaja lantang bejual sereta mantu nyungkak penatai pemisi sida.
Ku iya madah, palan bedaja nya deka digaga Ejensi Pemansang Ekonomi Sarawak (S-E-D-C) awakka pedaja lantang bejual ba endur ke besai seraya matak penatai mensia mayuh ari pelilih menua bukai datai ke Marudi.
“Aku arapka pemisi palan bedaja tu ulih diguna manah. Ukai semina nyadi palan ke tau matak temuai ari pelilih bukai datai ke Marudi, tang mantu nyungkak ekonomi raban pedaja di Marudi”, ku iya lebuh bejaku ba program bejadika Medan Niaga SEDC Marudi lebuh Hari Empat.
Nangkan ke nya, Penguang nerangka SEDC mega deka nambahka sebuah agi hotel betikas tiga bintang ngambika bisi endur temuai bemalam lebuh datai ke Marudi.
“SEDC deka ngaga sebuah agi hotel tiga bintang di Marudi. Premier Sarawak Datuk Patinggi Tan Sri Datuk Patinggi Abang Haji Abdul Rahman Zohari Tun Abang Haji Openg mega udah setuju deka nyendiaka taba ke alai nyadi rumah temuai sebedau tu ba atas bukit tu”.
Nambahka nya ku iya endur tu dipeda strategik dikena ngaga sebuah hotel tiga bintang ti ngemudahka temuai ti bisi datai ke Marudi lebih agi enti nyema bisi ngatur program besai baka regatta sereta ke bukai”, ku iya madah.
SEDC udah ngungkupka sebidang tanah di Marudi dikena ngaga Palan Medan Niaga nya ti deka meri pemaik ngagai peranak ke diau mendam dia kenyau ari taun 2020.
Pengawa ngaga palan bedaja nya udah berengkah kenyau 31 Januari 2020 lalu ditaga tembu kena 31 Mac 2022. – TVS
