KUCHING , 18 Ogos 2022 : Komiti Eksekutif Sarawak Dayak Graduate Association (SDGA) udah betemu enggau Menteri Pelajar, Inovasyen Enggau Pemansang Pengelandik Datuk Roland Sagah Wee Inn enggau Sapit Menteri ba Opis Premier Sarawak ( Undang-undang enggau Adat Bumiputera ), Jefferson Jamit.
Tuju penemuai basa tu diatur dikena nerangka program ke udah sereta deka dipejalaika raban tu.
Pia ku Gary Ningkan, Presiden Sarawak Dayak Graduate Association madah.
Ku Presiden Sarawak Dayak Graduate Association (SDGA), tuju penemuai basa tu diatur dikena nerangka senentang program ke udah diatur raban tu ba sepemanjai taun 2022.
“ Entara program ke udah diatur SDGA, iya nya SDGA education fair, ti diatur bulan Mei 2022 tu tadi, series randau SDGA bekaul enggau topik pengawa nyadi pedagang nguna teknologi baru”, ku iya lebuh ditelefon pengarang berita TVS.
Nangkan ke nya raban SDGA mega bisi ngatur program licha enggau karier ngagai nembiak sekula.
Nambahka nya ku Gary madah raban SDGA deka ngatur education and career fair kena 24 enggau 25 hari bulan September 2022 tu ila, di UCSI Hotel Kuching.
Menteri Pelajar, Inovasyen enggau Pemansang Pengelandik Datuk Roland Sagah Wee Inn enggau Sapit Menteri di Opis Premier Sarawak, Jefferson Jamit nyukung semua program ke diatur raban SDGA dalam ngemeranka bidang pelajar sereta nyukung semua anak Sarawak.
Ke lansa, seduai mega entara pemesai ba menua Sarawak ti udah lama nyadi kaban SDGA.
Sarawak Dayak Graduate Association ditumbuhka dikena mantu komuniti dayak ketebal agi dalam bidang pelajar tauka karier raban anak dayak Sarawak.
