KUCHING, 10 Julai: Aum besai gerempung pemansang pelajar jaku iban (AEDIL) 2022 mujur diatur ba Palan Pematih Pengajar Tinggi (IPG) Kampus Rajang, lebuh Hari Enam.
Aum besai tu digulu Kaban Kunsil Nengeri (ADUN) Krian, Friday Belik.
Ba pengawa bejadika aum besai AEDIL nya, Friday Belik madahka pengawa gerempung nya tau dipanjaika ngagai komuniti Iban kelimpah ari nembiak sekula.
Ku iya madah, tu laban pengawa nya ulih nyadi pelasar dikena ngerembaika agi adat enggau main asal bansa Iban ngambika enda punas ditelan arus pemansang.
Nya kebuah, gerempung AEDIL tu ngembuan tanggungpengawa ke besai dalam ngemeranka Jaku Iban seraya meri penemu ngagai orang mayuh sentang guna pekara nya.
Berindik ari nya, tetiap iku raban AEDIL mesti deka meda langkar penampak ke besai agi ti tau nguntungka bansa lalu ulih beserakup.
Ba pengawa nya, iya bisi meri agih belanja penyampau RM10,000 ngagai AEDIL kena ngaduka aktiviti sida.
Sama ngulu pengawa tu iya nya chairman AEDIL Dr. Lambat Lindong enggau sapit iya, Jamu Galih.
