BINTULU: Apai indai terus dilalau seruran matau enggau beratika ulah anak di rumah awakka sida enda terunda ngereja pengawa ke enda menuku, lebih agi ngaul diri ba pengawa salah nguna dadah.
Ku Pegawai Pelilih Tatau, Jabang Juntan madah, apai indai, nembiak enggau komuniti endang bela ngesan tangkup pengawa ke sama dikena nagang pengawa salah nguna dadah ari majak nambah di pelilih nya.
“Nyadi aku ngelalau bala apai indai nembiak enggau komuniti sama besaup beratika ulah anak di rumah.
“Enti sema kita ngasaika tauka tetemuka ulah anak bisi enda betul (ngambi dadah), aku meransang kita anang takut tauka nangi ngeripot sida ngagai opis kami PEMADAM di tatau,” ku iya madah.
Kelimpah ari nya, Jabang madahka, apai indai enggau pengibun nembiak mega ulih ngeripot ngagai kepala pengajar enggau prinsipal sekula ti sema tetemuka anak sida bisi ngereja pengawa salah nguna dadah.
Iya nerangka, Persatuan Pencegahan Dadah Malaysia (PEMADAM) enggau Agensi Antidadah Kebangsaan (AADK) bisi chara ulih mantu tetiap iku nembiak ke ditemu gian enggau ngambi dadah awakka sida badu agi ngereja pengawa nya seraya neruska pengidup enggau chara ke lebih gerai sereta selamat.
“Nyadi kitai ukai deka ngemediska sida, tang deka nulung ngeraika sida awakka badu agi ngambi dadah sereta bejalaika pengidup ke lebih menyana dudi hari,” ku iya madah agi.
Iya mega minta komuniti, lebih agi sida ke sama endur diau ba siti-siti genturung pendiau enggau rumah panjai sama beratika kes nembiak ke ngambi dadah, ngeripot terus ngagai ejensi enggau orang ke ulih mutarka pekara nya.
Iya mansutka jaku nya ngagai pengarang berita TVS apin lama ke udah.
