KUCHING, 27 Jun: Aplikasyen Sarawak Pay ti diatu dikumbai S Pay Global majak ngerembai diguna di serata Sarawak nyentuk ke menua pesisir.
Menteri ba Opis Premier Sarawak, Datuk John Sikie Tayai madahka, pemisi S Pay Global mayuh udah mantu pedagang lebih agi di menua pesisir seriris enggau inisiatif perintah Sarawak ti deka ngemeranka nguna digital dalam pengawa dagang.
Ku iya madah, nengah S Pay Global ngemuntangka pengawa bebayar kelimpah sebagi ari chara dikena mutarka isu penanggul bank ba sekeda kandang menua pesisir.
“S pay global ngemudahka pedagang ti bejalaika pengawa dagang lebih agi di menua pesisir laban enti ngarapka mata duit reti nya orang diau jauh di menua ulu pedis bulih duit.
“Diatu, siti chara ti diambi Premier Sarawak, Datuk Patinggi Tan Sri Abang Johari iya nya numbuhka S Pay Global tu dikena mantu rayat kelebih agi pedagang kitai,” ku iya.
Ke rikod, S Pay Global ti ditumbuhka perintah Sarawak ba taun 2017 diatu majak ngerembai lebuh ngerikodka 590, 290 iku penguna ke berejister enggau 85,445 iku pedagang di serata nengeri nyentuk ujung taun nyin tadi.
