KUCHING, 26 Jun: Peranak Dayak di Sarawak terus diperansang ngemansangka tanah awakka ulih meri penguntung ke besai ngagai sida jemah ila.
Premier Sarawak, Datuk Patinggi Tan Sri Abang Johari Tun Openg madahka, pekara tu endang beguna dikena nentuka tanah ti dikemansangka nya terus nyungkak ekonomi sereta nambahka asil penatai pemisi diri.
Pekara tu mega besenutuk enggau juluk sarawak ti deka nyadi pengeluar pemakai manggai taun 2030.
“Kitai mesti ngemansangka tanah kitai dikena nambahka produktiviti enggau ngerembaika guna tanah ungkup pengawa dagang.
“Betanam betupi mesti nguna teknologi ke moden sereta mekuhka digitalisasyen dikena nentuka kitai ulih mansutka mayuh pemakai enggau asil komoditi ke bukai,” ku iya madah.
Abang Johari nerangka, dunya diatu napi isu tauka krisis pemakai, tang sarawak enda napi penanggul nya laban, nengeri tu ngembuan tanah ke chukup besai ti ulih dikemansangka enggau pengawa bekebun sereta betupi ti ngasilka bekal pemakai ke chukup.
Sarawak bisi chara tauka perambu strakcha kediri empu dikena ngemansangka tanah di serata nengeri tu.
Berebak ari nya, iya madahka sarawak deka terus mekuhka pemansang pekereja ti bisi kualiti ke tinggi dikena nyungkak pemansang enggau pemujur nengeri tu ba mayuh macham sektor.
“Aku dipadahka pemutus peresa SPM 2021, bisi 596 iku nembiak di Sarawak bulih semua A ba dalam subjek ke diambi 12 iku ari sida bulih pemutus semua subjek A+.
“Tu mandangka kitai bisi daya ngemansangka Sarawak dudi hari seraya kitai bulih pekereja ti bisi kualiti ke tinggi lebih agi ba pengawa ngatur aset enggau ekonomi nengeri,”ku iya madah agi.
Iya mansutka jaku nya lebuh bejadika pengerami Makai Lemai Gawai Dayak renggat nengeri Sarawak lebuh malam Hari Enam. – TVS
Gambar: UKAS
