KUALA LUMPUR, 25 Jun: Opis Menteri Dagang Dalam Menua enggau Pekara Bebelika Barang (KPDNHEP) deka ngatur program ti ngaul pengemeran industri rentayan bekal manuk menua.
Menteri ke nguasa opis menteri nya, Dato Sri Alexander Nanta Linggi madahka, tuju nya dikena netapka rega siling manuk ke baru.
Iya madahka, program begulai sama nya diatur berindik ari Menteri Besai Datuk Seri Ismail Sabri Yaakob ti madahka perintah ngaga pemutus deka neruska pengawa netapka rega siling manuk di pasar.
“Program ti ngaul pengemeran industri ke bisi tanggung pengawa beguna ba dalam rentayan bekal manuk di pasar iya nya deka nentuka tikas rega siling.
“Tu berindik ari netapka rega siling sebedau tu dijangka abis timpuh kena 30 Jun, hari empat minggu baru,” ku iya madah nengah siti penerang ti dikunsika ba laman Facebook lebuh Hari Enam.
Nanta nerangka, aum nya berengkah diatur pagi hari enam deka belematika tetiap sanding penemu ke diberi dikena netapka tikas rega maksimum nyual manuk di pasar.
Nangkan ke nya, iya nyemetak madahka, tangkup pengawa KPDNHEP deka mekuhka ngagai pengawa neritka atur awakka pedagang nitihka rega siling ke udah ditetapka.
Ismail sabri madahka, rega siling baru manuk deka dibantaika Menteri Betanam Betupi enggau Industri Pemakai, Datuk Seri Dr Ronald Kiandee enda lama agi.
