KOTA SAMARAHAN, 22 Jun: Fakulti Seni Gunaan Dan Kreatif (FSGK) Universiti Malaysia Sarawak (UNIMAS) chakah deka nentuka raban graduet iya ukai semina bulih peluang gawa pengudah tembu belajar.
Pia mega ulih nyendiaka peluang gawa ngagai orang bukai tebal agi nembiak rebak baru jemah ila.
Ku Pengelicha Kanan FSGK Dr Muhammad Jameel Mohamed Kamil madah, fakulti nya seruran nyikap raban nembiak enggau pengelandik ti chukup dikena sida besemekih enggau orang bukai dalam begigaka pengawa.
“Baka ke ditemu kitai, Malaysia diatu benung nuju ngagai menua ke bepenatai pemisi ke tinggi.
“Nya alai, kitai ngarapka orang Malaysia ukai semina gawa enggau orang bukai tang ba awakka sama sida ulih muka peluang gawa baru ngagai nembiak jemah ila.
“Tu pekara ti dikemeratka kami ba Fakulti Seni Gunaan Dan Kreatif ngambika nembiak ulih besemekih pengudah graduet,” ku iya madah.
Tu siti saran ke besai fsgk iya nya nyendiaka nembiak ke bepenemu sereta bepenau ngambika bulih kereja ti manah.
Nangkan ke nya ku iya madah agi, naka ke diatu mayuh raban graduet FSGK bulih pengawa ti seriran enggau bidang ke dipelajar sida sereta mandangka penyulut.
“Mayuh ari nembiak kami ke udah graduet mandangka pemujur sekalika muka peluang kediri empu tauka gawa enggau serikat besai di Malaysia.
“Ambika banding, pelajar sinematografi gawa enggau produksyen filem, lalu graduet tekstil udah mujur muka butik sida empu enggau gawa ba produksyen ti begunaka pengelandik ngaga kostum,” ku iya madah agi.
Dr Muhammad Jameel munyi nya lebuh dirandau rambau Talent Recruitment And Career Exhibition (TRACE) di DeTAR UNIMAS.
