KUCHING, 22 Jun: Gerempung Pemikir Dayak Sarawak (DTTAS) ngatur program pemandang pelajar tauka DTTAS Education Fair 2022 ti mai tuju meri peluang enggau endur ngagai nembiak di kandang menua pesisir bulih penerang pelajar, bantu pelajar enggau latih ke bekaul.
Beduduk ari nya, nengah program nya nembiak ke udah ngambi Sijil Pelajaran Malaysia (SPM) enggau Sijil Tinggi Persekolahan Malaysia (STPM) ke enda mujur ba dalam akademik deka diberi peluang milih kus enggau bidang ke engkeman nitihka pemutus peresa enggau bidang ti dikerinduka sida.
Ku Sekretari Publisiti DTTAS Education Fair 2022 Malvina Albert Klinsing madah, nembiak ke abis pom 5 enggau Pom 6 ti enda bulih pemutus ke manah bisi ati sekalika deka nampung pelajar ke tikas lebih tinggi tauka terus ngiga peluang gawa.
“Nya meh entara kebuah program pemandang pelajar tu diatur dikena ngembing enggau meri penerang ngagai raban nembiak tu senentang kus, bidang enggau peluang gawa ke ulih ditangkup sida jemah ila.
“Pia mega, kitai enggai sida salah milih karier tauka pengawa ti mai penanggul ngagai sida dudi hari,” ku iya madah nengah siti penerang media lebuh Hari Tiga.
Iya nerangka, nengah program nya raban nembiak ulih ngaga pemutus ke pemadu manah awakka enda masau hari enggau duit sereta nyeliahka sida tinggal bulih peluang gawa ke manah pengudah abis belajar.
“Program tu diatur DTTAS ti disereta Yahos School of Skills enggau 12 institusyen sereta ejensi ke bekaul.
“DTTAS Education Fair tu mega siti program pelajar ke mindah ari siti endur ke endur bukai di serata Sarawak ke dipejalaika terus ari siti pelilih ke pelilih bukai,” ku iya madah.
Nangkan ke nya, Malvina nerangka, program nya dilangkar khas dikena meri penerang ti ngaul peluang pelajar, latih enggau bantu ungkup raban nembiak di serata Sarawak tebal agi nembiak baru abis SPM enggau STPM.
“Strategi tu chukup beguna berindik ari ubah pelajar enggau penteba ti dipinta ba siti-siti karier ti seruran mekuhka kedua-dua pekara nya.
“Perintah udah nyendiaka mayuh macham langgur pemansang ti mungkur mayuh sukut ke nyerangkung tangkup pengawa nembiak ba dalam industri dagang temuai, dagang enggau pengawa negapka budaya, ngetanka pemanah seni rayat pupu bansa sereta pemansang ekonomi di nengeri tu,” ku iya madah agi.
Berindik ari nya, raban graduet mesti nyikap diri nengah mayuh macham pengelandik awakka ulih besemekih begigaka peluang gawa ke lebih menyana enggau bisi pemereti ati senentang penyulut ba bidang akademik enda nyamin sida bulih pangku pengawa ke sama ikas enggau pemutus sida.
“Kitai deka raban nembiak aktif nguna pelantar ke udah disediaka perintah ngambika misyen enggau juluk DTTAS ti deka nempa nembiak ke ngembuan pengelandik ti tinggi sereta ulih diandalka ngemansangka nengeri jemah ila,” ku iya nambah.
