KUCHING, 20 Jun: Trend salah nguna dadah syabu, tauka lebih popular dikumbai ‘batu’, entara kes dadah pemadu tinggi ti diripot di Sarawak, nyengkaum ba Pelilih Sri Aman.
Nitihka penerang ari Polis Diraja Malaysia (PDRM) enggau Ejensi Anti Dadah Menua (AADK), 100 peratus orang ke tepejuh dalam aktiviti dadah tu ngambi dadah bansa syabu.
Berindik ari nya, Sapit Menteri Pemansang Pengelandik, Datuk Francis Harden Hollis, madahka saup ari semua komuniti bejalaika tangkup pengawa diri, kelebih agi bala apai indai, beguna amat kena nentuka aktiviti salah nguna dadah ulih ditagang.
Ku iya, sukung ari komuniti ulih mantu perintah ngemutarka isu dadah seriris enggau juluk ti deka nempa ‘Keluarga Simanggang ‘ ti nadai kes salah nguna dadah.
“Komuniti patut nemu chara tumu nagang aktiviti dadah, berengkah ari ruang bilik diri empu, ti ulih meri empas dalam pengawa nagang aktiviti salah nguna dadah,” ku iya dalam siti penerang lebuh Hari Enam.
Berebak enggau nya, semua raban ba renggat penerit atur, ke udah diberi kuasa, dipinta bejalaika pengawa enggau manah sereta meri ngeripotka sebarang aktiviti salah nguna dadah ba kandang endur diri.
Harden, ke mega Kaban Kunsil Nengeri (ADUN) Simanggang, madah tu laban dadah meri empas enda manah ti ulih ngujungka penyadi aktiviti jenayah baka ngerumpak, munuh sereta ti bukai.
Iya mansutka jaku nya rambau ‘Program Pendidikan dan Pencegahan Dadah’ beserimbai enggau Pengerami Peringatan Hari Anti Dadah Kebangsaan Taun 2022 ti diatur OSC MIDS Pelilih Sri Aman. – TVS
