KUCHING, 19 Jun: Pemansang ke udah dijapai di Sarawak berindik ari gaya politik ti tegap sereta sukung ti rat diberi rayat ngagai perintah nengeri.
Naib Yang Dipertua Kanan Parti Pesaka Bumiputera Bersatu (PBB), Dato Sri Fadillah Yusof madahka, penegap politik mesti deka ditumbuhka enggau dikemeranka dikena nentuka pemansang ulih diteruska.
“Nya entara kebuah penegap politik mesti ditumbuhka enggau ditanka laban gaya tu ti nyadi pugu enggau pelantar ti nyamin pengelantang, pengeraja enggau penampak nengeri Sarawak ti dikesayauka kitai tu.
Kitai mega temegah ati laban parti PBB nyadi sebuah parti politik ti nyadi teladan enggau mujur mantaika chunto ke ulih dimalin parti politik bukai di menua tu,” ku iya madah.
Berebak ari nya, Fadillah ke mega Kaban Parlimen Petrajaya madahka, PBB entara parti politik ti dipebasa ba menua tu ari sukut peneleba enggau pemujur.
Sebedau tu, ku iya madah, lebuh menua napi isu penyarut politik, PBB terus mengkang tegap sereta kering nempuh semua gelumbang pemar ke datai nuntung ungkup pemaik parti enggau nengeri Sarawak.
“Tu mandangka komitmen enggau pengelurus pengawa nyadi pekara ti dikemeratka raban tuai parti enggau semua kaban PBB ke bepegai rat ba konstitusyen parti ti nyengkaum disiplin, juluk, agenda sereta tunga kuing parti,” ku iya madah agi.
Fadillah ke mega Menteri Kanan Kereja Raya Malaysia mansutka jaku nya rambau mantaika mosyen politik beserimbai enggau Konvensyen PBB ke-15 2022 lebuh Hari Minggu.
