KUCHING, 17 Jun: Tuai Raban Nembiak Parti Pesaka Bumiputera Bersatu (PBB) Dato Gerald Rentap Jabu merambu ngagai perintah Sarawak ba baruh Gabungan Parti Sarawak (GPS) awakka meri bantu ngagai raban nembiak di Sarawak ngambi lisin deriba mutosikal tauka kerita.
Kebuah pia ku iya madah, pekara tu ulih mantu sida ngiga belanja pengudah abis sekula sekondari nengah chara ngiga peneleba gawa ba bidang servis nganjung pemakai baka Grab Food tauka Food Panda seraya nganti pemutus nampung pelajar sida ngagai tikas ke tinggi agi.
“Enggau tu aku deka merambu ngambika perintah GPS meri anak-anak kitai ke ngintu hari pengada sida ke-17 taun tu bantu ngambi lisin deriba kerita tauka mutosikal.
“Tu ulih mantu nyikap sida ngambi bagi ba industri nganjung pemakai enggau barang baka Grab Food enggau Food Panda enggau ke bukai.
“Ari penerang ke diterima kami, bisi lebih kurang 40,000 iku raban nembiak tetiap taun ngambi bagi ba pengawa nya.
“Nya alai aku minta ngagai Datuk Amar Douglas Uggah Embas, engka ulih meri bantu ukai terus ngagai sida tang bantu nengah palan belajar deriba iya nya bantu penyampau RM300 tauka baka bantu ke diberi nengah Kenyalang Gold Card”, ku iya madah.
Iya nerangka, Opis Menteri Raban Nembiak, Lumba enggau Pemansang Pedagang Sarawak nyendiaka mayuh inisiatif ungkup raban nembiak ti nyengkaum Micro Credit Financing, Sarawak Youth Creative Industry Fund, Gig Economy enggau ke bukai.
Nengah chara tu, raban nembiak ulih bisi peluang ngambi bagi ba gig economy ba era digital seraya lumba e-Sports ke majak diberi perati opis menteri nya.
Iya ngelalau raban nembiak awakka terus ngemansangka diri tebal agi napi pemar ekonomi ke enda tentu diatu.
“Siti jaku lalau ke deka dipadahka aku ba ditu tebal agi raban nembiak iya nya anang ngelusu , mesti kereja tang anang semina kereja bendar tang kereja meh enggau pemintar.
“Ila enti nadai kereja tusah kitai laban kitai tu meh dikearapka dudi hari. Enti enda robot tauka pekereja menua luar datai gawa kitu.”
“Guna meh peluang ke bisi mesti diambi, anang meda aja. Tu utai ke patut dikereja kitai,”ku iya madah agi.
Iya bejaku munyi nya ba Gempuru Besai Raban Nembiak PBB Sarawak lebuh Hari Lima.
