KUCHING, 16 Jun: Premier Sarawak Datuk Patinggi Tan Sri Abang Johari Tun Openg nerima penemuai basa ari Duta Jerman H.E Dr Peter Blomeyer di Wisma Bapa Malaysia lebuh Hari Empat.
Ku Dr Peter Blomeyer madah, penemuai basa nya ti keterubah diatur ke sarawak ke mai tuju dikena merambu kerejasama entara menua Jerman enggau Sarawak.
Tebal agi mekuhka pemansang ba mayuh macham sektor di nengeri tu.
Ku iya madah, ba penemuai basa nya, iya udah berunding enggau Premier Sarawak senentang kerejasama sereta peluang ke manah ti ulih dipejalaika dikena ngemansangka sektor ekonomi, pelajar enggau dagang temuai entara Sarawak enggau Jerman.
“Kami udah berundingka peluang enggau kerejasama ari sukut ekonomi ti ulih matak industri di Jerman datai kitu awakka serikat ari Jerman ulih nengkebang peluang ekonomi di Sarawak.
Naka ke diatu, mimit aja serikat ari Jerman bisi di Sarawak. Di Semenanjung Malaysia kitai bisi 700 buah serikat Jerman ke bejalaika operasyen di Malaysia enggau 400 dibuka ba baruh Dewan Perniagaan Dan Perindustrian Malaysia-Jerman. Nya alai, kami deka nengkebang peluang ke sama di Sarawak”
Nangkanka nya, iya madahka raban iya mega deka nengkebang peluang di sarawak ari sukut teknologi gadung, infrastrakcha, pengerai enggau digital.
Pia mega, iya madahka Jerman besedia meri bantu ke patut ngagai Sarawak dikena bejalaika pansik bekaul enggau utai tumbuh alga ti nyadi kereban api bio-fuel.-TVS
