BETONG, 16 Jun: Nembiak di sekula menua pesisir mujur bulih pemutus Sijil Pelajaran Malaysia (SPM) 2021 ti manah sebaka enggau nembiak di mengeri.
Tu mandangka nembiak ke mendam di menua pesisir bisi pengingin ati deka ngemansangka diri ba pelajar awakka bulih pengidup ke menyana dudi hari.
Taja pan napi mayuh macham pemar, tang nya ukai nyadi penanggul sida belajar bebendar sereta bulih penyulut.
Siku nembiak sekula ke nyulut ari SMK Datuk Patinggi Kedit, Adilles Gurang Jalak madahka, pemujur iya ba dalam peresa SPM serak tu ketegal enda rangka bekunsika penemu enggau bala bakih ke bukai.
“Kelimpah ari belajar bebendar dikena nyapai pemutus ke manah kitai mesti chukup makai, ngirup ai enggau tinduk. Nya entara tip aku ke pemadu dikemeratka.
“Udah nya kitai ulih ngajar bakih kitai baka pengajar. Kitai mega mesti bebasaka sida baka kitai bebasaka pengajar. Semua mesti diberi kitai basa. Enti kitai suah ngajar orang bukai, penemu kitai majak nambah,” ku iya madah rambau ditanya pengarang berita lebuh Hari Empat.
Kelimpah ari nya, Adilles ke bulih peresa SPM 6A madahka iya bisi ngaduka jadual belajar kediri empu ba rumah enggau datai ngagai kelas tuisyen ke diatur ba sekula.
Iya mega ngelalau bala nembiak bukai mesti bisi juluk ati ke deka dijapai awakka tau bekenanas belajar sereta bulih pemujur dudi hari.
Siku agi nembiak ke bulih pemutus peresa SPM 6A, Dear Dryee Rechel Ngabong madahka, iya endang beati amat meda sereta mendingka pekara ti diajar pengajar ba dalam kelas.
“Seruran mendingka pengajar ba kelas, anang kelalu mansal diri maya belajar sereta ngetu enda lama ti kelalu lelak. Ungkup batch 05 terus bebendar belajar ba peresa SPM 2022 tu,” ku Dear Dryee madah.
Iya madahka, iya diau ba buding ti ngemudahka iya belajar begulai enggau bakih ke bukai, betanya sereta ngiga chara ke pemadu engkeman mutarka sekeda pengawa sekula ke bekaul.
Ungkup rikod, bisi 84 iku nembiak ngambi peresa SPM 2021 di SMK Datuk Patinggi Kedit Betong.
