KUCHING, 16 Jun: Kerejasama ari serikat peribit beguna bendar mantu perintah ba dalam nerenak pengelandik nguna digital ungkup rayat di Sarawak awakka lebih inovatif bejalaika pengawa dagang sida.
Ku Sapit Menteri Perambu Mengeri, Pengatur Tanah Enggau Rampa Menua Datu Len Talif Salleh madah pedagang ti inovatif ulih ngasilka mayuh produk ke baru sereta bisi bida ti tau nyungkak asil penatai pemisi sida seraya mantu nengeri ngemansangka aktiviti ekonomi.
Nangkanka nya, ku iya madah, perintah udah nyendiaka palan baka TEGAS Digital Village dikena muka peluang raban pedagang bulih latih tebal agi nguna teknologi digital dalam bejalaika pengawa sida.
Iya bekunsika pekara nya nengah teks jaku iya ke dibacha Kaban Kunsil Nengeri (ADUN) Telang Usan Dennis Ngau ba TEGAS Digital Village di Kuching lebuh Hari Empat.
“Inisiatif ke dipejalaika perintah nengeri nengah TEGAS ti nyengkaum numbuhka TEGAS Digital Village and Digital Innovation Hub baka di Kuching, Bintulu enggau Miri.
“Pia mega, tu Mantu ngemudahka akses ngagai makit, meri duit turu ngagai rayat ke deka ngemunka pengawa dagang sereta nyendiaka kapasiti pemansang dikena nyungkak pengawa dagang enggau lengkas.
“Sarawak seruran meransang sektor peribit awakka mantu nengeri tu ngemeranka chara inovasyen awakka ulih meri pemaik ngagai mensia mayuh ke alai R.A.I.S.E tu siti chunto ke manah kerejasama ari serikat peribit”,
Ku iya madah, program ke baka R.A.I.S.E Innovation Masterclass tu manah bendar dalam nyendiaka latih ngagai pedagang dalam ngemeranka guna digital.
Tu nyengkaum saut tanya terus ari raban pedagang senentang pekara inovasyen ke ulih dikena sida ngasilka mayuh macham produk.
“Inovasyen tu beguna bendar dikena ngetanka penegap sesebengkah pengawa dagang awakka seruran relevan.
“Serikat ke nguna chara inovatif lebih ngasilka mayuh produk enggau servis ke baru lalu meretika peluang baru dalam makit. Pia mega ari sukut meretika trend enggau mutarka sekeda isu enggau chara ke semitan”, ku iya madah agi.
