KUCHING, 16 Jun: Sarawak ngerikodka pemutus peresa Sijil Pelajaran Malaysia (SPM) 2021 ke manah iya nya nyapai mujur nyapai Gred Pukul Rata Nengeri (GPN) 5.17.
Beduduk ari nya, Direktor Opis Pelajar Nengeri Sarawak, Datu Dr Azhar Ahmad madahka, bisi 596 iku chalun nyapai gred A ba semua subjek ke diambi ba dalam SPM 2021.
Iya madahka, bisi 12 iku chalun ke nyulut bulih gred A+ ba dalam semua subjek enggau siku chalun ngerikodka 11A+, enam iku chalun bulih 10A+ enggau lima iku chalun bulih 9A+.
“Ba nengeri Sarawak mayuh sekula di Sarawak ulih disimpulka ba baruh kategori sekula nyulut, manah sereta sedang. Meri pengaga ati ngagai kita semua.
“Ari ketiga-tiga kategori tu, bisi tiga buah sekula (1.59%) ba kategori ke nyulut, 30 buah sekula (15.87%) ba kategori sekula ke manah, 153 buah sekula (80.95%) ba kategori sedang pemanah sereta semina tiga buah sekula (1.59%) bisi potensi,” ku iya madah rambau mantaika pemutus peresa SPM 2021 di Auditorium Opis Pelajar Nengeri Sarawak lebuh Hari Empat.
Nangkan ke nya, Dr Azhar madahka, bepelasarka Gred Pukul Rata Sekula (GPS) bisi 17 buah sekula mujur nyadi entara sekula ke pemadu manah mantaika pemutus peresa SPM 2021.
“Entara rintai sekula nya nyengkaum SM Sains Kuching Utara, SM Sains Kuching, SM Sains Miri, SMK St Elizabeth, Kolej Datuk Patinggi Abang Haji Abdillah, Sekolah Seni Malaysia Sarawak, SMK Sacred Heart dan SMK Agama Miri.
“Kelimpah ari nya, entara sekula ke mantaika peresa ke pemadu manah iya nya Kolej Tun Datu Tuanku Haji Bujang, SMK St Anthony, SMK Agama Tun Ahmad Zaidi, SMK Kubong, SMK Tiong Hin, SMK Agama Sheikh Haji Othman Abdul Wahab, SMK Tung Hua, SMK Methodist, SMK Tinggi Sarikei dan SMK Sungai Tapang,” ku iya madah.
Iya madahka, semua 17 buah sekula nya mujur nyapai 100 peratus chalun ulih nerima setipikit SPM 2021.
