SELANGAU, 15 Jun: Pesta Selangau deka diatur ungkup taun 2022 berengkah ari 27 nyentuk 30 Julai pengudah dua taun enda diatur ketegal pengelekai COVID-19.
Kaban Kunsil Nengeri (ADUN) Tamin IR Christopher Gira Sambang madah, entara program ke deka diatur serak tu iya nya nyengkaum Selangau Rafting Challenge 2022 ke alai Kaunsil Pelilih Menua Pesisir Sibu (MDLBS) udah milih Opis Pelilih Selangau nyadi pengatur program nya.
Ku Gira madah, pesta selangau tu endang diatur ninting taun enggau mayuh macham aktiviti tauka program bukai diatur dikena ngerichahka agi program nya.
“Nyadi mayuh program deka diatur bala komiti ti betuaika Kaunsil Pelilih Menua Pesisir Sibu lalu Opis Pelilih Selangau nyadi pengatur proram tu.
“Entara program ke deka diatur iya nya berakit tauka Rafting Challenge, Karaoke, tarit tali enggau main futsal,” ku iya madah.
Iya bejaku munyi nya maya dirandau pengarang berita TVS nengah telefon.
Iya ke mega Penaung Komiti Besai Pesta Selangau 2022 begulai enggau Menteri di Opis Premier Sarawak Datuk John Sikie Tayai ngarapka pengawa nya ulih mujur diatur sereta bejalai lanchar seraya nentuka pengelikun mensia mayuh seruran ba tikas ke manah.
Pia mega, iya madahka program ke baka tu ulih nyungkak ekonomi peranak di sitak nya nengah penatai mensia mayuh tebal agi ari pelilih bukai ti datai ngulu program nya.
“Ari sukut pengawa Dagang temuai, program ke bakatu ulih narit temuai ari menua luar ngambika sama ngambi bagi ba program tu ke alai mayuh bansal enggau kedai dibuka ba tengah pasar Selangau ke ulih dilawa mensia mayuh.
“Nya alai, tu meri peluang ngagai peranak di sitak nya nambahka penatai pemisi nengah chara bedaja sepemanjai pesta nya,” ku iya madah agi.
Berindik ari nya, iya madahka program tu deka nyadi kelai dikena ngatur program besai agi di pelilih nya ungkup pemaik peranak ba dia dudi hari.
