KUCHING, 15 Jun: Kimpin Pemereti Ati Rampa Menua ‘Planet Us’ ba baruh Program International Digital Economy Conference Sarawak (IDECS) 2022 deka mantu nerenak pemereti ati raban nembiak bekaul enggau guna nyaga rampa menua seraya meretika penanggul ke ditapi ketegal ubah gaya hari kemaya hari tu.
Ku Sapit Menteri Pelajar, Inovasyen Enggau Pemansang Pengelandik ( Pemansang Nembiak Enggau Lumba) Dr Annuar Rapaee madah, kimpin sereta program pemandang ke baka tu seriran enggau juluk perintah ke deka semua raban enda ngira umur meretika senentang ubah gaya hari.
Tebal agi nentuka pemansang ti ngemeratka pengawa nyaga pemanah rampa menua.
Program tu deka diatur berengkah ari 15 Julai nyentuk ke tengan bulan September 2022 ba lima buah nengeri di Malaysia.
Entara aktiviti ke bisi diatur iya nya woksyop, program bekunsika penemu, lumba digital enggau web sereta sekeda pekit ti bekaul enggau rampa menua.
“Isu ubah gaya hari endang bisi kaul enggau pemansang rampa menua ti meruan. Nya alai, kitai mesti nerenak penemu ngagai raban nembiak senentang pekara tu.
“Endang amat kitai nadai subjek khas ungkup ubah rampa menua di sekula, tang ba tetiap subjek endang bisi kaul enggau pekara tu.
“Ba penemu aku, program pemandang ke baka diatur US Embassy enggau Biji Biji Initiatives tu deka nyadika kitai bekerejasama ngemesaika pekara tu ba nembiak sekula tebal agi tu endang seriran enggau polisi perintah ke deka ngetanka pemanah rampa menua,” ku iya madah.
Dr Annuar nerangka, , sarawak diatu benung ngatur mayuh macham program enggau inisiatif bekaul enggau pengawa nyaga rampa menua baka ke suah dipadahka Premier Sarawak Datuk Patinggi Tan Sri Abang Johari Tun Openg ti nyengkaum nguna kuasa ke ulih dikena baru baka hidrogen.
Iya bejaku munyi nya lebuh bejadika Kimpin Pemereti Ati Rampa Menua Planet Us ti diatur US Embassy enggau biji biji inisiatif lebuh Hari Tiga.
