BETONG, 13 Jun: Siku nembiak beumur 5 taun bebadi nyawa sepengudah sebuah Rumah Panjai iya nya Rumah Polly Anak Sulau, Bukong Asal, Jalai Lidong Bangat di Betong dituntung penusah angus pagi tadi.
Ku PBK I Henry Jugah ari Balai Bomba enggau Penyelamat Malaysia Bagi Menua Betong madah, tudah ke benama Rezdesson Carlos Anak Robson ditemu raban bomba bebadi sepengudah tepekul ba dapur rumah sida urung pukul 12.00 ngalih hari.
Nangkan ke nya indai tudah Ency Anak Shaylla, 25 taun betu 32.5 peratus lalu menyadi tudah Elsa Amanda Anak Robson, 2 taun betu 44.5 peratus lalu dianjung ngena EMRS ngagai Sepital Betong.
Ku Henry madah agi, raban bomba nerima kangau ari Nancy anak Sulan urung pukul 9.22 pagi hari satu lalu datai ba endur penusah nya nyadi urung pukl 10.10 pagi.
Sepengudah datai ba alai penusah nya nyadi, raban bomba tetemuka sebuah rumah panjai 11 pintu pemanjai 50 kaki pemesai enggau 220 pemanjai ti ngembuan 59 iku peranak udah angus 100 peratus.
Raban bomba nguna chara RECEO lebuh madamka api sereta bulih bekal ai ari pegung ti semak enggau endur nya.
Operasyen madamka api tembu urung pukul 12.20 ngalih hari.
Ejensi ke bisi enggau ba operasyen tu nyengkaum 2 iku raban polis, 4 iku raban Pengetan Mensia Mayuh (APM), dua iku ari Opis Residen, 4 iku ari Opis Pengintu Pengelantang Bagi Menua Betong enggau 2 iku ari Sarawak Energy.
