KUCHING, 12 Jun: Peranak Dayak di nengeri Sarawak terus diperansang ngemeratka pekara pelajar sereta anang muai peluang nampung pelajar nyentuk datai ba renggat ke lebih tinggi.
Sapit Premier Sarawak, Datuk Amar Douglas Uggah Embas madahka, perintah udah nyendiaka mayuh macham bantu, perengkaguna enggau program ke bekaul dikena nentuka anak Dayak diberi peluang ngasaika tikas pelajar ke lebih manah.
“Enti sema kita napi penanggul belanja dikena nampung pelajar, kitai ba perintah bisi nyendiaka bantu nengah Yayasan Sarawak, kitai ke bansa Dayak bisi Dayak Cultural Foundation (DCF) sereta nyendiaka bantu bukai dikena nentuka isu penyeranta ukai nyadi penanggul kitai ari neruska pengawa besekula,” ku iya madah rambau bejadika Pengerami Ngiling Bidai ti diatur Dayak Think Tank Association (DTTAS) lebuh Hari Enam.
Uggah ke mega Chairman DCF nerangka, perintah Sarawak iya nya Gabungan Parti Sarawak (GPS) seruran ngiga chara ti pemadu engkeman mantu tetiap iku anak Sarawak ke nyulut ba dalam bidang akademik nampung pelajar ba tikas ke lebih tinggi.
Ku iya ke mega Menteri Infrastakcha enggau Pemansang Penyangkai Kapal madah, dikena ngangkat manah sistem servis, perintah Sarawak endang ngelaluka perambu, ninga sebana sereta penusah ke ditapi rayat ti nyerangkung sukut pelajar.
“Diatu, nembiak ke ngena SPM bisi napi pemar lebuh ngiga peluang gawa.
“Beduduk ari nya, perintah Sarawak udah nyendiaka mayuh program latih enggau pengelandik enggau aku arapka semua kita ulih ngaul diri sereta ngambi bagi ba alam tetiap program ke diatur nya,” ku iya madah agi.
Iya madahka, isu orang nadai pengawa siti ari penanggul ke ditapi peranak Dayak sereta nya entara kebuah perintah nelebaka diri ba program pengelandik ti ulih meri peluang sida diterima gawa.
“Aku diatu menteri ke nyaga jalai, mayuh kunteriktor ke ngaga jematan, jalai mantaika sebana sida iya nya enda chukup pekereja ke gawa ba dalam sektor nya.
“ Pia mega, mayuh peranak kitai ke diai di rumah panjai bedau bisi pengawa. Nyadi, baka ni chara kitai deka nentuka sida ke nadai pengawa nya tau bulih peluang gawa,” ku Uggah madah agi.
