MIRI, 7 Jun: Pengerami Hari Gawai terus nyadi pelantar dikena negapka penyerakup enggau kerejasama entara peranak ke diau di rumah panjai.
Kaban Parlimen Sibuti, Lukanisman Awang Sauni madahka, kerejasama ti rat entara rayat enggau perintah ti ngujungka pengerami serak tu dikemendarka diintu pengudah perintah udah nenduka sekeda garis lalau (SOP).
“Pengudah dua taun Hari Gawai enda disambut ketegal pengekai igi penyakit COVID-19, taun tu kitai ulih mulaika diri ke menua.
‘Mayuh macham program ke diatur ti ulih negutka kaul peranak di rumah panjai,” ku iya madah lebuh dirandau pengudah datai ngabang ke Rumah Aron Sungai Sebatuk, Suai Niah ensanus.
Lukanisman nerangka, penyerakup di rumah panjai ngemudahka pengawa perintah mai mayuh agi pemansang lebih agi di kandang menua pesisir awakka pengelantang pengidup rayat terus dikemujurka.
“Enti kitai meda sebedau 1 Jun 2022 semua endur ti nyengkaum pasar Batu Niah, Bekenu enggau di Miri chukup kiruh nerima penatai mensia mayuh ke bebelika barang ti nandaka peranak nyendiaka diri deka ngintu Hari Gawai,” ku iya madah.
Nangkan ke nya, iya ngelalau rayat di sitak parlimen Sibuti terus meri kerejasama sereta nyukung tetiap program enggau projek pemansang ti dibai perintah Sarawak.
Iya mega pechaya pengerami Hari Gawai ke diintu serak tu meri peneleba ke chukup berega ngagai semua orang sekalika sida ke mendam di mengeri tauka di rumah panjai.
“Peneleba aku ke ngabang beserimbai enggau Hari Gawai taun tu chukup manah ke alai 122 buah rumah panjai sama ngintu pengerami Hari Gawai ti ngujungka aku enda ulih ngabang ngagai rumah panjai ke bukai,” ku iya madah agi.
Ba pengawa ngabang nya, Lukanisman bisi ngaul diri ba program ke diatur peranak di Rumah Aron seraya ngabas pemansang ke udah digaga sereta diperambu di rumah panjai nya. – TVS
