KUCHING, 7 Jun: Raban orang dagang patut ngeransingka diri nunda chara dagang di menua luar tauka ba tikas global laban nya sebengkah ari chara ti manah dikena ngemansangka sereta bedajaka dagang sida.
Pekara nya dikunsika Dr Siti Mardinah Abdul Hamid iya nya siku ari orang dagang ke udah nyulut.
Ku iya madah, peluang ngerembaika dagang endang semampai dibuka ngagai semua pedagang di menua tu.
Lebih agi orang dagang bumiputera ngambika sida ulih mujur baka pedagang bansa bukai ti lama udah mujur.
Kelimpah ari nya, bejalaika dagang ba renggat dunya enda muntang, tang orang dagang ulih mansang enti sida deka besemekih ba renggat antarabansa laban diatu perintah meransang sida neritka agi kaul dagang enggau pedagang di menua bukai.
“Bisi sekeda raban ari Brunei deka nyadi ejen linut tu. Nyadi kitai benung ngatur dokumen tauka sempekat laban enti ka tama ke Brunei lebih agi barang pemakai, sida ngemeratka pengelikun pemakai, QC enggau ke bukai nya alai kitai deka ngatur semua nya baru kitai ulih nganjung barang ke Brunei Darussalam.
Kelimpah ari nya, iya bisi juluk ati deka ngajar nembiak rebak baru senentang barang pemakai asal baka (linut) ngambika enda punas seraya nerenak penemu sida bekaul enggau pemakai asal.
“Lebuh aku nanya sekeda raban nembiak sekalika ngelala linut tauka enda, bisi ke nyaut enda, bisi kurang nemu, bisi sekeda madah kala meda tang enda kala ngasai. Lebuh aku nanya nemu ngaga tauka enda, enda nemu. Kala nguji makai, enda kala. Nyadi aku deka ngiga chara baka ni deka narit ati sida bekaul enggau barang pemakai tradisi,” ku iya.
Iya bekunsika penerang nya ba dalam program Sejahtera Asia lebuh hari dua.
