BETONG, 1 JUN: Raban ke bekaul udah nyendiaka mayuh macham inisiatif sekalika ari sukut geran, bantu tauka latih ungkup sida ke deka belajar ngaga kraf jari di menua tu.
Berindik ari nya, mayuh macham pelantar disediaka ungkup mensia mayuh dikena ngansah pengelandik enggau penau sida seraya nerenakka pengerindu senentang pekara tu.
Ambika banding, Jijah Ngumbang, 47 taun asal ari Padeh Betong iya nya siku pedaja produk kraf jari madahka diri udah belajar ngaga kraf tu ari palan pemansang kraf jari Betong lalu diatu industri nya mantu nyungkak penatai pemisi iya.
Iya udah belajar ngaga kraf jari kenyau ari taun 1994 sepengelama tiga taun ba palan Pemansang Kraf Jari Betong.
“Keterubah, aku belatih ba Palan Pemansang Kraf jari Betong dalam taun 1994 lalu agi mengkang aktif dalam industri tu nyentuk ke diatu.
“Maya nya aku ulih dipadah kusung tauka bedau nemu endar senentang pengawa ngaga kraf jari tu lalu sepengudah aku ngerejister diri ba Palan Pemansang Kraf Jari Betong, kami diberi latih ngaga tenun ikat, tenun karap enggau tenun songket.
“Aku tebuka ati ngisi pom ngambi bagi ba latih tu laban aku tu ukai orang pandai sekula sereta nadai pengawa bukai nya alai aku nguji neruska minat aku ngaga kraf jari tu
Ku iya madah agi, Kraf jari Betong endang meri sukung penuh ngagai sida ke rindu ngaga kraf jari nengah chara nyendiaka perengka guna tauka kereban ungkup sida ngaga kediri produk ke ulih dijual sida
“Sida ari Palan Pemansang Krafjari Betong nya mantu kami nengah chara meri ubung tauka ‘dye’ chura laban sida sigi meransang kami nyadi pedagang sepengudah kami tembu latih nya.
“Sida iya mega bisi nulung kami ngelakuka barang nengah mayuh macham pelantar, lalu kami deka ngambi bagi enti sida bisi ngatur pengawa bedaja,” ku iya madah agi.
Jijah madahka raban ari Palan Kraf jari mayuh bekunsika penemu enggau runding senentang motif tauka chura beg enggau kain ke bisi digaga iya.
Dalam sehari iya ulih ngasilka lebih kurang dua ngagai tiga beg tetiap hari bepanggai ba chura enggau beg nya.
“Enti beg nya nitihka chura tauka bansa lalu enti mudah digaga kadang bisi dua tauka tiga iti ulih ditembuka aku dalam sehari.
“laban aku ngereja utai tu maya lepa tauka ‘part-time’, kelimpah ari aku ke ngereja pengawa ba rumah panjai,”ku iya madah.
Antara produk ke bisi digaga sereta dijait iya ungkup ke dijual iya nya beg motif enggau anyam, pua kumbu, selampai, tenun ikat enggau tenun kusung.
Iya ngelalau raban nembiak rebak baru awakka bela ngemansangka kraf jari tebal agi bekaul enggau bansa dayak ngambika ulih mengkang dipandang jemah ila.
“Ungkup bala nembiak, anang enggai tauka malu belajar laban ari enda nemu nya meh kitai tau nyadi nemu.
“Mayuh macham pelantar ke disediaka orang sereta mayuh macham chara orang nagajar kitai sekalika nengah kus ke diberi.
“Ngarapka nembiak rebak baru deka belajar ke utai ti baka tu awakka enda punas ditelan arus pemansang,” ku iya madah.
