BETONG, 31 Mei: Pemendar dalam ngintu pengerami Hari Gawai Dayak taun tu endang meri reti ke besai ngagai mensia mayuh tebal agi sida ke diau di rumah panjai.
Kebuah pia, laban taun tu pengerami Gawai ulih disambut enggau bala mayuh sereta dirichahka enggau mayuh bengkah program sepengudah dua taun menua dituntung pandemik COVID-19.
Ku Tuai Rumah Bebanggai Kanan, Margaret Anak Achik madah, iya chukup gaga ati laban pengerami hari gawai ulih diintu baka selama sereta mayuh raban ari mengeri ulih mulaika diri ke menua.
Margaret madah, tetiap kali pengerami hari gawai, rumah panjai iya seruran nyendiaka mayuh bengkah pemakai asal bansa iban baka penganan semut, chuan, pulut enggau ke bukai.
“Nyadi ba pengawa ngintu Hari Gawai tu, bisi ga kami serumah udah nyendiaka utai kena begawai baka Penganan Semut, Chuan enggau pemakai ke bukai.
“Tu dikena nyambut penatai kaban belayan ke datai ari mengeri sepengudah lama enda mulaika diri ketegal pandemik COVID-19 tu,” ku iya madah.
Iya bejaku munyi nya lebuh dirandau pengarang berita ba rumah panjai iya di Bebanggai Kanan bedau lama ke udah.
Ku iya madah agi, pengerami Hari Gawai seruran dirichahka enggau raban nembiak ke suah ngatur mayuh macham main dikena ngerindang ati maya Gawai baka pekit kumang, karaoke enggau main asal ke bukai nyengkaum ngajat sereta niti ranyai.
“Bala nembiak ke suah agi ngatur mayuh macham pekit lebuh ngintu pengerami nya dikena ngerichahka agi pengawa nya.
“Maya Gawai kitai bela begempuru di ruai seraya bebuti enggau pangan diri dikena ngerapitka agi kaul entara diri enggau orang bukai,” ku iya madah agi.
Nangkan ke nya, Margaret mega madahka iya rindu ati meda pemulai diri sebilik enggau kaban belayan di nengeri sepengudah lama enda betemu ketegal COVID-19.
Nya alai ku iya madah pengerami gawai tu meri peluang ngagai bala mayuh betemu baru sereta begelumu enggau diri sebilik dikena ngintu pengerami nya.
