BETONG, 31 Mei: Tetiap pelilih di Sarawak endang chakah ngatur mayuh bengkah aktiviti tauka program beserimbai enggau pengerami Hari Gawai.
Dalam timpuh nya komiti gawai ba tetiap pelilih udah ngatur aktiviti nyengkaum Karnival Gawai, Bazar Gawai enggau ke bukai dikena ngerichahka agi pengawa ngintu hari gawai seraya mandangka main asal bansa dayak ke bisi di menua tu.
Ku Ujai Sambau iya nya Chairman Komiti Gawai Bagi Menua Betong madahka, di pelilih nya pengerami Hari Gawai diintu enggau mayuh macham aktiviti ti mungkur semua komiti ungkup raban nembiak nyentukka orang besai tuai bisi diatur.
Iya berasai gaga ati laban mayuh aktiviti udah diatur nyengkaum karnival gawai, makai lemai, bazar gawai enggau pekit kumang udah diatur taun tu sepengudah dua taun enda dikemendarka.
Lalu timbal mensia mayuh senentang program tu endang manah sereta disambut semua komiti ke alai mayuh peranak di pelilih nya bela ngambi bagi ba sekeda program tauka aktiviti ke bisi diatur.
“Pengawa ngintu pengerami Hari Gawai Dayak diatur ukai semina makai lemai aja tang Komiti Gawai Dayak Bagi Menua Betong bisi ngatur Karnival Gawai ke diatur seminggu sebedau makai malam Gawai Dayak.
“Nyadi mayuh aktiviti diatur dikena ngerapitka kaul mensia mayuh tauka peranak di Betong kelimpah ari dikena kitai ngingatka sereta ngetanka main asal kitai Iban,”ku iya madah.
Antara pekit ke udah diatur iya nya Pekit Nyumpit, Pekit Nyumai, Pekit Batak Tali Enggau XPDC Bukit Sadok.
Ku iya madah, Karnival Gawai di Menua Betong diatur ngaul semua ejensi perintah, gerempung ukai dikuasa perintah (NGO) enggau ke bukai ti udah besaup ngatur program tu dikena nentuka program tu bejalai enggau lanchar.
“Program Gawai di Betong dibagi ngagai dua segmen nyengkaum Karnival Gawai lalu aktiviti ke bisi diatur iya nya Batak Lampung, Batak Tali lalu ungkup anak mit bisi mega Pekit Nyura diatur.
“Pia mega, Pekit Nyumai Pemakai Tradisional Dayak mega bisi diatur sepengudah lama enda diatur baka ke sebedau tu,” ku iya madah.
Entara ejensi ke ngulu sereta mantu ngemujurka pengawa tu iya nya Opis Residen Betong, Sepital Betong , Opis Bomba Enggau Penyelamat Betong enggau NGO iya nya Kelab Ngepan Betong sereta Layar Education Development Centre (LEDC).
