Perengkaguna ti manah meri peransang ngagai atlit

KUCHING, 27 Mei: Perengkaguna lumba ti manah meri peransang ngagai atlit belatih enggau ati ti andal.
Sapit Menteri Nembiak Lumba Enggau Pemansang Orang Dagang, Dato Gerald Rentap Jabu madah, tu mega ulih ngangkatka agi tikas penau sida dalam bidang lumba lebuh ngari ke menua ba renggat dunya.
Berindik ari nya, gelanggang tenis ba Sekolah Sukan Negeri Tabuan Jaya udah dikemanahka ke pengelantang atlit.
“Enti deka champion kitai mesti meri latih ti manah, endur ti manah enggau pemadu beguna iya nya tikas perengkaguna ke kena kitai baka gelanggang tu mesti ba gaya tikas ti manah,” ku iya.
Iya bejaku munyi nya ba pengawa Nyain Sempekat Pemereti Ati (MOU) entara Perbadanan Sukan Sarawak (SSC) enggau Gerempung Tenis Sarawak (SLTA) ba Palan Akuatik Pandelela Rinong lebuh Hari Lima.
Ba awak ke sama, dua buah gelanggang tenis di bagi menua Betong udah dikemanahka tikas.
Kelimpah ari nya, opis menteri iya benung berunding enggau Maktab Rendah Sains Mara (MRSM) Betong deka nambah tiga agi gelanggang tenis.