KUCHING, 26 Mei: Perintah Sarawak pechaya nengah perambu pengawa ba baruh Strategi Pemansang Pasca COVID-19 (PCDS 2030), Sektor ngelembang deka ulih nyungkak asil ari pengawa meranak puku ti dianggarka penyampau RM6.7 billion.
Tebal agi, ba dalam industri ‘midstream’ enggau ‘downstream’ manggai taun 2030.
Sektor tu dijangka deka muka lebih kurang 5,300 peluang gawa ba dalam mayuh macam bidang enggau pakar sereta “economic spin-off” ti beungkus lebih ari RM3.5 billion setaun ba dalam makit Sarawak.
Sapit Premier, Datuk Amar Awang Tengah Ali Hasan madahka, perintah Sarawak udah ngemendarka ungkup penyampau RM15 juta ba dalam Perambu Malaysia Lumpar Ke-12 dikena bejalaika pansik pemisi asil mineral ba endur pemesai lebih kurang 26,164.22 kilometer persegi tauka 2,616,422 hektar ke bedau kala diserungkai agi sereta dikena nembuka data tumu mineral Sarawak.
“Data tu deka mantu perintah Sarawak ngelala sekeda daya industri ti bepelasarka asil mineral.
“Bisi 13 perambu pengawa besai enggau 59 sub-perambu pengawa mega udah disediaka sebedau dipejalaika ba pun taun 2022 nyentuk 2030 dikena nyapai inisiatif ke udah ditetapka,” ku iya madah rambau nyimpul jurai jaku opis menteri iya ba aum Kunsil Nengeri (DUN) Sarawak lebuh Hari Empat.
Awang Tengah ke mega Menteri Pengeraja Asal enggau Pemansang Mengeri Kedua nerangka, dikena ngemunka pengawa nya, perintah udah ngemendarka penumbuh Seksyen Asil Mineral enggau Geosains di Opis Menteri Asil Pengeraja Asal enggau Pemansang mengeri kena 22 Februari 2022.
“Seksyen tu deja mekuhka pemansang sektor ngelembang seraya nentuka semua pemujur perambu pengawa ke udah ditetapka,” ku iya madah agi.
Iya madahka, perintah Sarawak udah meda daya pengulih ba sektor ngelembang di Sarawak ke ulih dikemansangka nyadi entara siti sektor ekonomi besai ke mai pemaik sereta penguntung ngagai rayat. – TVS
