KUCHING, 26 Mei: Perintah Gabungan Parti Sarawak (GPS) bebendar deka nagang pengawa nebang kayu ti nadai pemendar sereta aktiviti ke ngelanggar undang-undang kampung di nengeri tu.
Sapit Premier, Datuk Amar Awang Tengah Ali Hasan madahka, entara chara ti dipejalaika iya nya numbuhka Raban Mindah Khas Nagang Pengawa Nebang Kayu Nadai Pemendar.
“Tangkup pengawa raban tu iya nya ngatur semua operasyen ti ngaul kerejasama ari mayuh macham ejensi penerit adat di renggat nengeri enggau perintah besai,” ku iya madah rambau nyimpul jurai jaku opis menteri iya ba aum Kunsil Nengeri (DUN) Sarawak lebuh Hari Empat.
Berebak ari nya, iya madahka perintah Sarawak nengah Opis Kampung nguna mayuh macham teknologi pemadu baru baka hiperspektral, imej satelit, Sistem Revlog, Revlog Mobile Application enggau Continuous Monitoring and Surveillance (COMOS).
“Semua perengka tu dikena matau kandang endur enggau nyidi pengawa nebang kayu nadai pemendar di kampung.
“Kenyau ari taun 2020 nyentuk bulan April 2022, bisi 215 keretas tasat udah dibuka ti ngaul mayuh macham penyalah di kampung. Ari penyampau nya, 55 kes agi benung ditasat Opis Kampung Sarawak, 160 kes udah dibantaika ba
Unit Pengelikun enggau Penerit Adat Nengeri (UKPN) enggau Bilik Luyar Besai Nengeri (SAG),” ku iya madah.
Nangkan ke nya, Awang Tengah ke mega Menteri Pengeraja Asal enggau Pemansang Mengeri Kedua ngelalau mensia mayuh enggau semua ejensi bekerejasama meri penerang ke bekaul enti sema bisi tetemuka aktiviti nebang kayu nadai pemendar ba semak genturung pendiau sida.
“Tu ulih mantu atur ke patut ulih diambi dikena ngemunasaka pengawa ti ngelanggar undang-undang ke tau ngeruga ekosistem kampung sereta asil pengeraja asal ngagai perintah Sarawak,” ku iya madah agi. – TVS
