KUCHING, 25 Mei: Opis Menteri Betanam Betupi Moden enggau Pemansang Kandang Menua Sarawak udah netapka enam inisiatif dikena nambahka pengeluar beras di nengeri tu.
Menteri Betanam Betupi Moden enggau Pemansang Kandang Menua Sarawak, Dato Sri Dr Stephen Rundi Utom madahka, tuju nya dikena nyapai tikas peminta guna beras ke patut iya nya 60% manggai taun 2030.
Entara inisiatif nya ngemanahka tikas enggau nyeruri infrastrakcha ba 14 Skim Parit enggau Entali Ai di serata Sarawak ke mungkur tanah pemesai 2,829 hektar.
‘Pekara tu dikena nentuka skim nya besenutuk enggau pengawa nanam padi tauka bumai sereta ngurangka tanah endur nanam padi ditukar nyadi tanah endur nanam sawit ti endang ditemu mai mayuh penguntung ngagai pekebun.
“Kedua ngemansangka endur baru alai nanam padi. Endur baru ke udah dikelala alai nanam padi berai tu mungkur 100 hektar di Kampung Mujat di Serian enggau di Abok Selepong di Sri Aman enggau anggar pemesai tanah ti diguna iya nya 3,000 hektar,” ku iya madah rambau nyimpul jurai Opi Menteri Betanam Betupi Moden enggau Pemansang Kandang Menua Sarawak ba aum Kunsil Nengeri (DUN) Sarawak ke-19 lebuh Hari Tiga.
Nangkan ke nya, Rundi madahka, inisiatif ti ketiga iya nya opis menteri deka terus bejalaika program perintah-peribit dikena matak sektor peribit meranak puku sereta ngaul diri ngemansangka pengawa nanam padi.
‘Ba baruh inisiatif tu perintah deka nyendiaka perengkaguna baka sistem entali ai ba endur nanam padi sereta infrastrakcha bukai seraya sektor peribit meranak puku ba pengawa ngeluarka padi, pengawa nginjin padi sereta pengawa bedaja beras.
“Pia mega, model baru ke dikumbai SMART Large Scale Paddy Planting Model (SMART SBB) deka diguna di Sarawak,” ku Rundi madah.
Inisiatif ti keempat iya nya pekebun nanam padi di Sarawak diperansang nguna mekanisasyen ladang enggau automasyen dikena nambahka pengeluar padi tauka produktiviti.
“Kelima iya nya ngeluarka benih padi ti bisi kualiti. Opis menteri aku deka bekerejasama enggau institusyen pemansik enggau sekeda ejensi peribit bukai dikena nambahka pengeluar benih padi ti bisi kualiti sereta nambahka produktiviti,” ku iya madah agi.
Berebak ari nya, iya nerangka, inisiatif ti keenam iya nya opis menteri deka mantaika Insentif Pengeluar Padi ngagai pekebun enggau orang ke bumai dikena mantu nyungkak pengeluar padi domestik.
Bepelasarka rikod, penyampau hektar padi di Sarawak udah majak kurang iya nya ari pemesai 130,000 hektar ba taun 2012 ngagai kira-kira 83,000 hektar ba taun 2021. – TVS
