KUCHING, 24 Mei: Sarawak Research and Development Council’s Research Grant Schemes (SRGS) udah nyendiaka duit turu dikena bejalaika pansik seraya numbuhka bidang ke baru asil ari pengawa pansik nya nengah chara ke strategik.
Ku Menteri Pelajar, Inovasyen enggau Pemansang Pengelandik, Datuk Roland Sagah Wee Inn madahka, Sarawak Research and Development Council udah nyendiaka geran sukung sepenyampau RM13.286 juta ungkup peminta ke mujur dikena bejalaika projek khas enggau sekula di Sarawak.
Sarawak Research and Development Council Grant udah dipadahka kenyau ari taun 2019 ke alai scientist bepalan di Sarawak dikangau nganjung peminta sida tebal agi ba bidang Bioindustry and Biomedical health sciences, Agriculture and Food, Biodiversity and Environment enggau Engineering Sciences.
“Ba baruh geran keterubah tu, Kaunsil Pemansik udah ngagihka RM6.996 juta ngagai 46 peminta ke mujur enggau RM100,000 agi ngagai 20 buah sekula ba baruh program Brigthsparx.
“Geran kedua baka ke dipadahka kena September 2020 ungkup ngemunka pansik, nyungkak enggau inisiatif khas sereta duit turu komersil.
“Pia mega, Kaunsil nya madahka nyaran dua program pansik iya nya “Waging War Against Anti-Microbial Resistance” enggau “Engkabang, the Wonders of Sarawak”
“Bisi 300 iku peminta deka ngambi bagi udah diterima lalu sepengudah belematika peminta tu, kaunsil udah meri RM1.993 juta ngagai 13 iku peminta ke mujur,” ku iya madah.
Iya bejaku munyi nya lebuh meri jurai jaku ngagai Tuai Pemegai Menua Yang Di-Pertua Nengeri Sarawak ba aum DUN Sarawak ke-19 lebuh hari dua.
SRDC mega udah meri geran ngagai tiga bengkah projek khas iya nya Rabies Diagnostic Research penyampau RM500,000 ba taun 2019 , 2021 SARS-COV2 Serology penyampau RM2.895 ngagai Institut Pengerai enggau Perubat Komuniti UNIMAS, lalu RM800, 000 ngagai Sarawak Biodiversity Centre (SBC) ungkup 2021 SBC-SRDC SARS Biotherapeutics.
