KUCHING , 24 Mei: Perintah sarawak nengah Opis Menteri Pelajar, Inovasyen enggau Pemansang Pengelandik Sarawak udah meri mayuh macham bantu kereban dikena ngajar enggau belajar di semua sekula di Sarawak.
Ku Menteri Pelajar, Inovasyen enggau Pemansang Pengelandik Sarawak, Datuk Roland Sagah Wee Inn madah bantu tu deka terus diberi.
Entara kereban tambah tauka bantu kereban dikena belajar enggau ngajar ke diberi iya nya komputer raspberry pi, kereban dikena belajar national geographic enggau bup malin pengajar sereta bup dikena belajar.
Datuk Roland Sagah madahka bantu baka tu deka diteruska kelebih agi ungkup nembiak enggau pengajar ba sekula di kandang menua pesisir ngambika sida enda tinggal ari nerima bantu baka tu.
“Entara bantu ke diberi iya nya komputer raspberry pi, kereban dikena belajar national geographics, bup malin pengajar enggau bup dikena nembiak belajar. Bantu tu deka terus diberi ngambika raban pengajar enggau nembiak ketebal agi sida di menua pesisir enda tinggal ari nerima bantu tu”, ku iya.
Kelimpah ari nya Opis Menteri Pelajar (MOE) mega seruran deka meri bantu baka perabut enggau katil tang nitihka peminta enggau guna sekula lalu semina sekula ke patut aja ulih nerima bantu tu berindik ari ungkus ti ditatak ungkup bantu tu.
Ya bejaku munyi nya lebuh meri jurai jaku ngagai Tuai Pemegai Menua Yang Di-Pertua Nengeri Sarawak ba Aum Dun Sarawak ke-19 lebuh hari dua.
