KUCHING, 24 Mei: Perintah seruran chakah belematika sereta mutarka isu sekula repuk di Sarawak.
Ku Menteri Pelajar, Inovasyen enggau Pemansang Pengelandik Datuk Roland Sagah Wee Inn madah, kenyau ari taun 2016, perintah besai nengah Opis Menteri Pelajar udah nyendiaka kira-kira RM1.7 bilion ungkup 242 buah projek pemansang sekula lalu perintah Sarawak udah nyendiaka RM1.3 bilion ungkup 213 buah projek pemansang sekula.
Penyampau tu nyengkaum bayar dulu RM1 bilion ngagai perintah besai, projek rayat penyampau RM140 juta enggau ngangkatmanah sekula ba baruh RECODA penyampau RM160 juta.
“Ba taun 2016, penyampau sekula repuk di Sarawak iya nya 1,020 ke alai ari penyampau nya bisi 415 buah sekula ba baruh kategori DS3, 210 kategori DS2 enggau 395 kategori DS1.
“Naka ke diatu, bisi 455 buah sekula repuk ba baruh tiga kategori nya udah diseruri, digaga baru enggau projek diengkah ba endur baru.
“Ari penyampau nya, 245 buah projek udah tembu digaga lalu 566 buah sekula benung dipansik lalu deka dikemansangka dudi hari ila,” ku iya madah.
Bepelasarka rikod, kategori DS1 iya nya begunan sekula ke beumur 30-40 taun sereta jai 25%, DS2 iya nya begunan kayu ke manggai umur 40-50 taun ti patut diseruri, enggau DS3 iya nya begunan sekula ke beumur 50 taun ke atas ke jai 75% ti patut diseruri.
Ku Roland ke mega Kaban Kunsil Nengeri (ADUN) Tarat madah agi, perintah enggau naka ulih mutarka isu repuk tu berindik ari penanggul ari sukut penyampau sekula repuk ke mayuh di Sarawak sereta penyampau duit turu ke enda chukup dikena nampung peminta tu.
Nya kebuah, naka ke diatu, perintah ngemeratka nyeruri sekula pemadu repuk dulu awakka diseruri dulu.
Iya bejaku munyi nya lebuh meri jurai jaku ngagai Tuai Pemegai Menua Yang Di-Pertua Nengeri Sarawak ba aum DUN Sarawak ke-19 lebuh hari dua.
