BETONG, 22 Mei : Pekit Kumang Gawai 2022 Bagi Menua Betong 2022 mujur diatur enggau naka pengerichah sereta lanchar kena malam hari enam di Dewan Tan Sri Datuk Amar Stephen Kalong Ningkan.
Ba malam pekit nya, Ullia Ulanda udah mujur bulih gela Kumang Gawai 2022 ti bepekit enggau tujuh iku agi indu dara ke bukai.
Lebuh dirandau pengarang berita TVS, Ullia madahka diri berasai gaga ati bulih gela tu laban iya udah lama nyikap diri sebedau ngambi bagi ba pekit tu.
“Keterubah sekali aku meri terima kasih ngagai semua orang ke udah nyukung aku. Aku berasai amat gaga ati laban aku lama udah lama nyikap diri ba mayuh sukut ke patut sebedau mujur bulih gela tu laban tu ukai pekara ke mudah.
“Pekit tu mega ngajar aku mayuh macham pekara tebal agi bekaul enggau main asal kitai Iban seraya ulih nerenak ulah ke manah ngagai aku empu laban aku patut magi jam entara kereja enggau nyendiaka diri enggau pekit tu,’ ku iya madah agi.
Iya ke mega gawa nyadi Projek Injinier sereta landik ngajat madahka, endang mayuh macham pemar sereta penguji ke ditapi lebuh nyikap diri enggau pekit.
“Siti pemar ke ditapi aku iya nya aku ngembuan pangku pengawa gawa ba taba projek. Kelimpah ari nya, aku patut ngatur jam belatih enggau gawa ngambika enda ngachau pengawa ti dikereja aku,” ku iya nambah agi.
Ku iya madah agi, pekit baka tu patut suah diatur dikena ngemeranka main asal bansa kitai Iban awakka ulih ditemu ba tikas ke tinggi agi ti nyengkaum ba renggat entarabansa.
Ba malam pekit tu ke diatur, bisi tujuh iku dituduh nyadi akim dikena milih Kumang Gawai tu ari lapan iku pesereta.
Nangkanka nya, Kumang Gawai ba pekit tu mai pulai perais mata duit RM5,000, Pakej bemalam 3 hari dua malam ba Hotel Grand Magherita sereta trofi.
Pia mega, lumur dua tauka Lulong Gawai bulih RM4,000 lalu lumur tiga tauka Selinggar Matahari bulih RM3,000.
Sama bisi datai ba Pekit tu iya nya, Sapit Premier Sarawak Datuk Amar Douglas Uggah Embas, Kaban Kunsil Nengeri (ADUN) Layar Dato Gerald Rentap Jabu, Kaban Kunsil Nengeri (ADUN) Krian Friday Belik enggau Kaban Kunsil Nengeri (ADUN) Saribas Mohamad Razi Sitam.
