KUCHING, 18 Mei : Sepital Baru Sri Aman ti deka disikap enggau empat pakar perubat ke bebida ti nyerangkung perubat dalam, Paediatric, Obstetrics enggau Gynaecology sereta Psikiatri diatu benung dikemanahka tikas nyadi Sepital Pakar Mit.
Sapit Menteri Pengerai Mensia Mayuh, Pengawa Berumah enggau Kaunsil Kandang Menua II, Michael Tiang madahka, enti sema sepital nya dibuka penuh kena bulan Ogos taun tu bisi tiga penambah pakar deka disikap ba dia baka pengawa bedah am, Orthopaedics enggau Anaesthesiology.
“Enti dipeda nengah chara fizikal sepital baru tu udah tembu enggau ba renggat ti kepenudi diperesa, diuji sereta sekeda pekara udah dipejalaika kitai.
“Sepital tu deka tembu digaga ba ujung bulan Ogos taun tu,” ku iya madah rambau nyaut tanya ari Kaban Kunsil Nengeri (ADUN) Lingga Dayang Noorazah Awang Sohor senentang perambu deka ngengkah dutur pakar di Sepital Sri Aman enggau ngangkat manah servis klinik perintah sereta nyendiaka Palan Dialisis di sitak DUN Lingga, ba Aum Kunsil Nengeri (DUN) Ke-19.
Berebak ari nya, Micheal madahka, Klinik Pengerai Lingga mega dikemanahka tikas ba baruh Perambu Malaysia Lumpar Ke-12 (RMK12) sereta dijangka tembu ba ujung taun 2022.
Kelimpah ari nya, iya nerangka bisi mega langgur deka nganti Klinik Pengerai Tanjung Bijat ngagai Klinik Pengerai Bansa 5 ti disikap enggau kuaters ba baruh (RMK12). – TVS
