KUCHING: Bisi 13 kandang endur ba dalam Kunsil Nengeri (DUN) Meluan ti pemesai 117,194 hektar tauka 289,586 ekar udah dikemendarka disukat perimeter tanah Hak Adat Bumiputera (NCR).
Ngambi penerang ari UKAS, Sapit Menteri Pengeraja Asal enggau Pemansang Mengeri, Datu Len Talif Salleh madahka, ari penyampau nya bisi 10 kandang endur pemesai 107,303 hektar tauka 265,145 ekar udah tembu disukat.
Iya madahka, siti kandang endur pemesai 524 hektar tauka 1,295 ekar deka disukat enda lama agi enggau dua agi kandang endur pemesai 9,367 hektar tauka 23,146 ekar bedau ulih disukat ketegal bisi penanggul bukai.
“Bisi semilan kandang endur pemesai 56,726 hektar tauka 140,170 ekar udah digazet nyadi Rizab Komunal Bumiputera (Betanam Betupi) ba baruh seksyen 6 Kanun Tanah Negeri.
“Ari penyampau nya, dua kandang endur pemesai 22,087 hektar tauka 54,577 ekar udah dikemendarka disukat nguna chara siku-siku orang,” ku iya madah rambau nyaut tanya ari Kaban Kunsil Nengeri ADUN Meluan, Rolland Duat Jubin ba hari kedua Aum Kedua Penggal ti Keterubah DUN Sarawak Ke-19 lebuh Hari Tiga.
Nangkan ke nya, Len nerangka bisi siti kandang endur udah tembu disukat ti ngaul 825 lot enggau pemesai 1,450 hektar tauka 3,583.
“Bisi siti agi kandang endur pemesai 20,637 hektar tauka 50,994 deka disukat ti bepanggai ba siku-siku orang ke ngempu tanah.
“Ungkup kandang endur tanah hak adat bumiputera ke endang ditemu orang ngempu sereta bedau dipinta, orang ke nuntut nya dilalau mantaika peminta betulis ngagai Opis Tanah enggau Survei Bagi Menua Sarikei,” ku iya madah agi.
