SIBU, 12 Mei: Taun tu ‘Sibu International Dance Festival’ (SIDF) Ke-9 deka diatur baru di Sibu sepengudah dua taun diketuka ketegal pengekai COVID-19.
Ku Sekretari Mendam di Opis Menteri Dagang Temuai, Industri Kreatif enggau Seni Pemerindang Sarawak Hii Chang Kee madah, festival tu mantu bedajaka penyelai enggau pemanah seni enggau main asal rayat pupu bansa di Sarawak, lebih agi di Sibu.
‘Sebedau tu kitai bejaku senentang 27 bansa ke bebida tang diatu pengudah ubah digaga ba konstitusyen perintah nengeri kitai udah nambahka mayuh agi bansa.
“Lebuh kitai bejaku senentang raban sub-etnik, kitai bisi lebih 40. Enti kitai meda tetiap etnik bisi bida kostum, pemakai, tanda, pengawa, jaku enggau ke bukai.
“Sarawak endang ditemu kaya enggau mayuh macham pesaka lama, seni enggau main asal ti patut dipandangka kitai lebih agi beserimbai enggau festival tu,” ku iya madah.
Beduduk ari nya, iya madahka sida chukup temegah ati laban mayuh aktiviti enggau program deka diatur ba dalam festival nya.
‘Aku arapka festival tu nerima sambut ari mensia mayuh, tebal agi peranak ke mendam di Sibu,” ku iya madah agi.
SIDF dijangka berengkah diatur kena 9 Jun nyentuk 11 Jun ti ngayanka bemacham aktviti ti nyengkaum woksyop, licha sereta konsert ti deka diatur ba Sibu Civic Centre.
Mensia mayuh ke bisi tanya enggau deka meli tikit ulih ngelawa laman web http://sidfestival.com tauka betelefon ngagai lumur 084-349932 enggau 01138449932.
