SRI AMAN, 12 Mei: Penolong Kanan Pentadbiran (PKP) iya nya personel ti beguna dalam nentuka semua juluk enggau objektif sekula nyadi organisasyen pelajar ti bekualiti.
Menteri Pelajar, Inovasyen Enggau Pemansang Pengelandik Sarawak, Datuk Roland Sagah Wee In madahka, tetiap penolong kanan patut nyikap diri enggau penemu sereta ngembuan ulah ti positif lalu regas bejalaika pengawa seriris enggau pangku pengawa sida.
Ku iya, penyulut tikas pelajar Malaysia dipeda ari dua pekara iya nya kualiti sekula enggau kualiti pemandai nembiak.
Sekula ti bekualiti bepanggai ngagai tuai ke megai sekula, atur ti manah sereta ba pemujur Proses Ngajar enggau Belajar (PDP).
Beduduk ari nya, PKP patut nemu tanggungpengawa sereta nyukung pengawa sekula lebih agi dalam bidang kokurikulum ngambika ulih nyapai tikas pemujur nembiak ti mungkur semua bidang.
“Dalam hal tu, tanggungpengawa ketuai (PKP) ti ngembing, ngiring enggau meri peransang ti manah amat relevan enggau efektif dikena nyapai juluk sekula,” ku iya.
Iya mansutka jaku nya ba Program Pemantapan Kepimpinan Dan Pengurusan Pendidikan : Kualiti Sekolah ( SKPMg2) Untuk Guru Penolong Kanan Pentadbiran PPD Betong taun 2022 ke diatur di Simanggang lebuh Hari Tiga.
Tuju program tu diatur dikena nambahka penemu enggau pengelandik PK pentadbiran sekula bepelasarka SKPMG2.
