BINTULU, 8 Mei: Pemujur nembiak ba dalam pelajar entara pekara ti diberi perati perintah Sarawak.
Mayuh macham inisiatif enggau chara ti dipejalaika perintah dikena nambahka pengelantang nembiak lebuh besekula ti nyengkaum nembiak di menua pesisir.
Ngambi berita ari UKAS, Sapit Menteri Pengerai Mensia Mayuh enggau Pengawa Berumah, Michael Tiang Ming Tee madahka, tetiap iku anak Sarawak diberi peluang ke sama ngemujurka diri sereta belajar ba sekula antarabansa.
“Semua anak di Sarawak deka ngasaika pemaik ke sama sereta bisi peluang belajar ba sekula antarabansa.
“Nya entara kebuah perintah Sarawak deka numbuhka enam buah sekula entarabansa ungkup nembiak ari ruang bilik B40.
“Ba sekula antarabansa nya sida bisi peluang nerima pelajar ti sebaka ba renggat antarabansa,” ku iya madah rambau ngarika Sapit Premier Sarawak Dato Sri Dr Sim Kui Hian bejadika pengerami Pra Gawai Dayak 2022 di Bintulu lebuh Hari Enam.
Michael nerangka, semina perintah Sarawak ti nyadi perintah ke numbuhka enam buah sekula entarabansa dikena meri peluang nembiak ari ruang bilik B40 belajar ba sekula antarabansa ti sebaka ba sekula antarabansa peribit tauka di menua luar.
Iya madahka, perintah Sarawak deka ngaga sebuah sekula antarabansa perintah di Bintulu entara taun 2024 enggau 2025.
“Sebuah sekula antarabansa perintah deka digaga di Bintulu entara taun 2024 enggau 2025,” ku iya madah agi.
