KUALA LUMPUR, 8 Mei: Rayat Malaysia tebal agi raban nembiak dilalau seruran bejejaga lebuh nerima peluang gawa di menua luar awakka enda ditipu ejen gawa.
Menteri Luar Datuk Saifuddin Abdullah madahka, mayuh kes rayat ari menua tu ditipu ejen gawa di menua Kemboja apin lama ke udah.
Beduduk ari nya, iya nangkan tetiap iku rayat Malaysia anang enda bejimat nerima peluang gawa ti diayanka ba mayuh macham chara sekalika nengah whatapp terus ke lumur telefon orang ke benung ngiga kereja.
“Enti ulih rayat Malaysia ke benung ngiga kereja mesti meresa silik peluang gawa ti disediaka nya, lebih agi di menua luar,” ku iya madah.
Saifuddin nerangka, duta Malaysia di menua luar semampai nyikap diri meri sanding penemu senentang pekara nya sereta mantu peranak Malaysia ke ditinggang penusah.
Berebak ari nya, iya madahka rayat Malaysia ke nguna penerang bekaul enggau serikat ke nyendiaka peluang gawa ulih minta bantu duta tauka pengari Malaysia di menua luar tauka nengah servis konsular opis menteri.
Sebedau tu, berita ti ngaul 16 iku rayat Malaysia ke madahka diri ditipu ejen gawa di Kemboja udah selamat pulai ke menua tu ari Phnom Penh ba bulan siti nyin suba.
Ku iya madah agi, lebih 20 iku rayat Malaysia agi mengkang di Phnom Penh nganti gintir dibai pulai ke menua tu.
