KUCHING, 6 Mei : Taja pan aplikasyen MySejahtera kurang diguna ninting hari diatu, tebal agi kena ngerejister diri sebedau tama ngagai premis baka ke sebedau tu, tang aplikasyen tu agi beguna bendar dalam sekeda pekara.
Ku Pegawai Pengerai Bagi Menua Betong, Dr Johnny Pangkas, madah, diatu aplikasyen MySejahtera ulih diguna mensia mayuh nyidi endur ti bisi penyakit berampit sereta bulih penerang baru.
Ambika chunto, ku iya, MySejahtera tu endur mensia mayuh nyidi penyakit berampit (Infectious Disease Tracker) baka penyakit kaki, jari enggau mulut (HFMD).
Pia mega, penteba baru ba aplikasyen MySejahtera tu mega ulih meda endur tauka ‘hotspot’ ti bisi penyakit bukai baka tampuk buah, ‘rabies’ enggau tabin denggi.
“Nyadi Mysejahtera tu agi diguna kitai kena kitai nyeliahka diri ari penyakit berampit baka ti dipadahka aku dalam chunto nya. Nyadi kelimpah ari nya, enti kitai meda, penteba MySejahtera diatu bisi guna bukai, iya nya mansutka gerah ari Opis Menteri Pengerai (KKM).
“Udah nya, iya bisi mega meri penyauh fasiliti pengerai. Nyadi data ti baka tu amat beguna enti kitai bisi berubat tauka bisi pengawa ti berumban.
“Nyadi arapka bala kitai agi nyimpan aplikasyen MySejahtera tu laban iya bisi fungsi baru, ia nya mantaika ‘hotspot’ penyakit berampit,” ku iya madah lebuh ditelefon pengarang berita TVS.
Nya kebuah, ku Dr Johnny, mensia mayuh diarapka agi nyimpan aplikasyen MySejahtera tu dikena ngulihka penerang baru ari KKM. – TVS
