KUCHING, 6 Mei: Penyakit Tabin Babi Afrika (ASF) di Sarawak udah ditukuka ba tikas ke ulih ditagang, berindik ari nadai kes berampit baru diripotka.
Ku Menteri Betanam Betupi Moden enggau Pemansang Kandang Menua, Dato Sri Dr Stephen Rundi Utom madah, tu mandangka pengasi chara ti dipejalaika opis menteri enggau Opis Servis Veterinar Sarawak (JPVS) nagang pengekai penyakit nya di nengeri tu.
Iya madahka, naka 28 April ke udah 17 sampel udah diperesa, lima sampel ditetapka positif iya nya di Betong (4) enggau Sibu (1).
“Pengawa meresi kandang enggau ngemunaska babi udah dipejalaika ba sekeda endur ke bisi ngerikodka kes ASF.
“Ladang babi enggau pengawa matau ke terus dipejalaika ngerikodka 12 sampel negatif beresi ari ASF ti ngaul ladang babi di Jalai Engsengei Serian, Melikin Serian, Batu 25 Siburan Serian, Rumah Endur Nyayat Babi Sri Aman, Rantau Panjang Sibu, Jalai Tien King Sibu, Futien Sibu sereta Sungai Maaw Sibu,” ku iya madah ba dalam siti penerang media lebuh Hari Lima.
Nangkan ke nya, Dr Rundi beterima kasih ngagai orang ke nupi babi ke udah meri kerejasama rat ngagai JPVS ba pengawa nagang sereta ngemunasaka babi ti dirampit penyakit ASF.
Iya nerangka, senentang bekal babi chukup beserimbai enggau pengerami Hari Gawai ti deka disambut enda lama agi sereta selamat laban dikeluarka ari ladang babi ke beresi ari ASF sereta udah diperesa JPVS.
Sarawak ekspot 2,000 iku babi tetiap minggu ke Singapura ti ngayanka Opis Servis Veterinar Singapura enggau Ejensi Bekuasa Pemakai Singapura (SFA) ngaku chara nagang enggau nyeliahka ti dipejalaika Sarawak.
